ދައުލަތުގެ މީޑިއާ މެދުވެރިކުރައްވައި ރައްތިތުންނާއި މައުލޫމާތު ހިއްސާކުރައްވަމުން މިނިސްޓަރު މިއަދު ވިދާޅުވީ ރަޖިސްޓަރީ ދޫކުރުމުގެ މަސައްކަތް ކުރިއަށް އޮތް ދެތިން މަހުގެ ތެރޭގައި ނިންމާލެވޭނެކަމަށެވެ. އަދި ގޯތި ލިބޭ ފަރާތްތަކަށް ވަގުތީ ލިޔުމެއް ދޫކުރާނެ ކަމަށް ވެސް އޭނާ ވިދާޅުވި އެވެ.
ގުޅިފަޅުން ދޫކުރަނީ ހަތް ސައިޒެއްގެ 3،520 ގޯއްޗެވެ. މި ގޯތިތަކުގެ ގުރުއަތުލުން މިހާރު ދަނީ ކުރިއަށެވެ. އަދި ގޯތި ލިބޭ ސަރަހައްދު ހިޔާވަހި ޕޯޓަލުން ފެންނަން ހުންނާނެ ކަމަށް ހައުސިން މިނިސްޓްރީން ބުނެ އެވެ.
ގުޅިފަޅު ބްރިޖާ ގުޅޭ މައުލޫމާތު ދެނީ -- ފޮޓޯ: ޕްލޭނިން މިނިސްޓްރީ
ގުޅިފަޅުގެ އާ ލޭންޑް ޔޫސް ޕްލޭނުގައި ބިމުގެ 21 ޕަސަންޓު ވަނީ ޕާކުތަކާއި ހުސްބިމަށް ކަނޑައަޅާފަ އެވެ. އަދި މީހުން ދިރިއުޅޭ ސަރަހައްދުތަކުން ސްކޫލުތަކާ ހަމައަށް 10 މިނެޓުން ހިނގާފައި ދެވޭނެ ގޮތަށް ވަނީ ރޭވިފަ އެވެ. މިސްކިތްތަކާ ހަމައަށް ފަސް މިނެޓުން ދެވޭނެ އެވެ.
ގުޅިފަޅުގައި ވެހިކަލް ޕާކުކުރުމަށް 70،000 ޕާކިން ސަރަހައްދު ވަނީ ކަނޑައަޅާފަ އެވެ.
ބްރިޖު ނިމޭނީ ކޮން ދުވަހަކުން؟
ބުރިޖުގެ 45.82 ޕަސަންޓު މިހާރު ނިމިފައިވާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތޮލިބް ވަނީ އިއްޔެ ވިދާޅުވެފައެވެ.
ކޮންސްޓްރަކްޝަން މިނިސްޓްރީން ކުރިން ބުނެފައިވަނީ 2026ގެ ސެޕްޓެމްބަރުގެ ނިޔަލަށް ބްރިޖްގެ މަސައްކަތް ނިންމާލެވޭނެ ކަމަށެވެ.
ތިލަމާލެ ބްރިޖުގެ މަޝްރޫއަކީ އިންޑިއާގެ އެގްޒިމް ބޭންކުގެ ލޯނަކުން ހިންގާ މަޝްރޫއެކެވެ. އެ މަސައްކަތް ކުރިއަށް ގެންދަނީ އިންޑިއާގެ އެފްކޮންސް ކުންފުނިންނެވެ.
ކުރީ ސަރުކާރުގައި އެ މަސައްކަތް ކުރިއަށް ދިޔައީ ތާވަލަށް ވުރެ ލަސްކޮށެވެ.
ތިލަމާލެ ބްރިޖު އަޅަން ވިލިމާލެ ފަޅުތެރޭގައި ޖަހާފައިވާ ތަނބެއް.-- ފޮޓޯ: ފޮޓޯ: މުހައްމަދު ނާޝިދު
މި މަޝްރޫއުގެ އަގަކީ 500 މިލިއަން ޑޮލަރު (6.2 ބިލިއަން ރުފިޔާ) އެވެ. އޭގެ ތެރެއިން 100 މިލިއަން ޑޮލަރު (1.55 ބިލިއަން ރުފިޔާ) އަކީ އިންޑިއާގެ ހިލޭ އެހީއެވެ.
ބްރިޖުގެ މަސައްކަތުގައި ތުރުކީ، ޖަރުމަން އަދި އޮސްޓްރޭލިޔާގެ މާހިރުން ވެސް ބައިވެރިވެއެވެ. މި މަޝްރޫއުއަށް ލޯނު ދިނީ އިންޑިއާގެ އެގްޒިމް ބޭންކުންނެވެ.
