މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ އިގްތިސާދީ ކޮމިޓީގައި ވާހަކަ ދައްކަވަމުންނެވެ.
މިނިސްޓަރު އަމީން ވިދާޅުވީ ސަރުކާރުން ޓެކްސީގެ ހިދުމަތް ދިނުމަށް ސަރުކާރު ހިއްސާވާ ކުންފުންޏަކާ ހަވާލު ކުރަން ނިންމާ އެ މަސައްކަތް ކުރަމުން އަންނަކަމަށެވެ. އަދި ހިދުމަތް ދޭން ފަށާނީ މުޅިން އާ ކާރުތައް ގެނެސްގެނަކަމަށްވެސް މިނިސްޓަރު އަމީން ވިދާޅުވިއެވެ. އަދި ތަކެތި ޕާކުކުރަން ބިންތައް ކަނޑައަޅާ ކުރިޔަށް އޮތް 10 ވަރަކަށް ދުވަސްތެރޭ މިނިސްޓްރީއަށް ލިބޭނެކަމަށްވެސް އަމީން ވިދާޅުވިއެވެ.
މިިނިސްޓަރު އަމީން ވަނީ ސަރުކާރުން ޓެކްސީގެ ހިދުމަތް ދިނުމަށް ވިސްނަވާ ގޮތްވެސް ހާމަކުރައްވާފައެވެ. އެގޮތުން އާރުޓީއެލް ބަހުގެ ހިދުމަތް އެމްޓީސީސީން ދެމުން އަންނަ ގޮތަށް އެ ކުންފުންޏަށް ކެޕިޓަލް އިންވެސްޓްމަންޓް ދީގެން ދިގު މުއްދަތަކަށް ހިދުމަތް ދިނުމަށް ހަވާލު ކުރެވިދާނެކަން މިނިސްޓަރު އަމީން ފާހަގަކުރެއްވިއެވެ.
މިނިސްޓަރު އަމީން ވިދާޅުވީ ސަރުކާރުން ޓެކްސީގެ ހިދުމަތް ފަށާނީ ޑްރައިވަރުންގެ ބާރު ނުހިނގާ ގޮތަށް ހުރިހާ ގަޑިއެއްގައި އެއްވެސް ދައްޗެއް ނެތި ހިދުމަތް ލިބޭނޭ ގޮތަށްކަމަށެވެ. އެގޮތުން ޑްރައިވަރަށް އެއްވެސް މުއާމަލާތެއް ނުކުރެވޭނެކަމަށައި ފައިސާ ނަގާނެ ވަރެއްވެސް ޑްރައިވަރަށް ނުނިންމޭނެކަމަށް އަމީން ވިދާޅުވިއެވެ.
ޓެކްސީގެ ހިދުމަތް ފަށާނީ ފަށާނީ 50 އިންސައްތަ ފުލްކޮށް މަސައްކަތް ކުރާ މުވައްޒަފުންނާއި އެކުކަމަށް މިނިސްޓަރު އަމީން ވިދާޅުވިއެވެ. އަދި ހިދުމަތް ދިނުމުގައި މަދުވެގެން 20 އިންސައްތަ ބޭނުންކުރާނީ އިލެކްޓްރިކް ވެެހިކަލްތައްކަމަށްވެސް މިނިސްޓަރު ވަނީ ވިދާޅުވެފައެވެ.
