ހިޒްބުﷲގެ ލީޑަރަކަށް ނާއިމް އައްޔަންކޮށްފައިވަނީ އެ މަގާމުގައި މީގެ ކުރިން ހުންނެވި، ހަސަން ނަސްރުﷲ، އިސްރާއީލުގެ ހަމަލާއެއްގައި ޝަހީދުކޮށްލުމާއި ގުޅިގެންނެވެ.
ނަސްރުﷲ ޝަހީދުކޮށްލާފައިވަނީ މިދިޔަ ސެޕްޓެމްބަރު 27 ވަނަ ދުވަހު، ލުބުނާނުގެ ވެރިރަށް ބެއިރޫތަށް އިޒުރޭލުން ދިން ނުރައްކާތެރި ވައިގެ ހަމަލާއެއްގަ އެވެ.
ހިޒްބުﷲއިން މިއަދު ބުނީ، އެ ޖަމާއަތުގެ ލީޑަރަކަށް އަދި ސެކްރެޓަރީ ޖެނެރަލްގެ މަގާމުގައި ހުންނެވި ހަސަން ނަސްރުﷲ ޝަހީދުކޮށްލުމާއި ގުޅިގެން އެމަގާމަށް ނައިމް ހާސިމް އައްޔަންކޮށްފައިވާ ކަމަށެވެ. އޭނާ އެ މަގާމަށް އައްޔަން ކޮށްފައިވަނީ ހިޒްބުﷲގެ އުސޫލުތަކާއި ލަނޑުދަނޑިތަކަށް ބޯލަނބާތީ ކަމަށް ވެސް ވަނީ ބުނެފަ އެވެ.
ޔަހޫދީން މިދިޔަ މަހުގެ ތެރޭގައި ލުބްނާނަށް އަރައި ގަނެ، އެ ގައުމު ސުންނާފަތި ކުރުމުގެ މަސައްކަތް ކުރަމުންދާ އިރު، ހަމަލާތައް އެންމެ ބޮޑަށް އަމާޒު ކުރަނީ ހިޒްބުﷲ ގެ ވެރިންނަށެވެ. ނަމަވެސް ހަމަލާތަކުގައި މިހާތަނަށް އާންމުންގެ އެތައް ބައެއްގެ ފުރާނަ ވެސް ވަނީ ގެއްލިގެން ގޮސްފަ އެވެ.
1991 ވަނަ އަހަރު ހިޒްބުﷲއާއި ގުޅުނު ނައިމް ގާސިމްގެ ލީޑަޝިޕްގެ ފުރަތަމަ ޗެލެންޖަކީ އޭނާގެ ކުރީގެ ލީޑަރު ޝަހީދުކޮށްލި ފަރާތްތަކާ ދެކޮޅަށް އަޅަން ޖެހޭ ފިޔަވަޅުތަކާ މެދު ނިންމުންތަކެއް ނިންމުމެވެ. މީގެ އިތުރުން މުޅި ސަރަޙައްދުގެ ހަމަޖެހުމާއި އަމަންއަމާންކަމަށް އަސަރުނުކުރާނެ ގޮތަކަށް ހިޒްބުﷲގެ ކުރިމަގުގެ ދައުރު ކަނޑައެޅުމުގެ މަސްއޫލިއްޔަތު ވެސް އޭނާއާ ވަނީ ހަވާލުވެފަ އެވެ.
އިޒްރޭލުން ސެޕްޓެމްބަރު 23 އިން ފެށިގެން ލުބްނާންގައި ދޭ ހަމަލަތަކުގައި މަރުވެފައިވާ މީހުންގެ އަދަދު ވަނީ 1615 އަށް އަރައިފަ އެވެ.
