މި ދެ ރަށުގައި ބީއެމްއެލް އިން އަލަށް ހުޅުވި އޭޓީއެމް ސެންޓަރުތަކުން ދުވާލަކު 24 ގަޑިއިރު އަސާސީ ބޭންކިން ހިދުމަތްތައް ލިބޭނެ އެވެ. އޭގެ ތެރޭގައި ފައިސާ ނެގުމާއި، ޖަމާކުރުމާއި އަދި ފައިސާ ޓްރާންސްފާ ކުރުން ހިމެނެ އެވެ.
ހިދުމަތް އިތުރު ދެ ރަށެއްގައި ފެށުމާ އެކު، އއ. އަތޮޅުގައި ބީއެމްއެލްގެ ޖުމްލަ 6 އޭޓީއެމް ސެންޓަރު ހުންނާނެ އެވެ. މި އަތޮޅުގައި ހުރި އޭޓީއެމް ސެންޓަރުތަކުގެ އިތުރުން 2006 ވަނަ އަހަރު ރަސްދޫގައި ހުޅުވި އެ ބެންކުގެ ބްރާންޗް މެދުވެރިކޮށް ބީއެމްއެލް އިން އަންނަނީ އެ އަތޮޅުގައި ބޭންކިން ހިދުމަތްތައް ދެމުންނެވެ.
ބީއެމްއެލްގެ ސީއީއޯ މުހައްމަދު ޝަރީފް ވިދާޅުވި ގޮތުގައި، އއ. އަތޮޅުގައި އެ ބެންކުގެ އޭޓީއެމް ވިއުގަ ފުޅާކޮށް ފެރިދު އާއި ބޮޑުފޮޅުދޫގެ ރައްޔިތުންނަށް އަސާސީ ބޭންކިން ހިދުމަތްތައް އިތުރަށް ފަސޭހައިން ލިބޭނެ މަގު ތަނަވަސްކުރެވުމަކީ އުފަލެކެވެ.
މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 39 ބްރާންޗް، 89 ސެލްފް ސާވިސް ބޭންކިން ސެންޓަރ، 144 އޭޓީއެމް، ކޭޝް އޭޖެންޓުގެ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާއެކު ބީއެމްއެލްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް އެ ބޭންކުން ބުނެ އެވެ.
