މަޖިލީހުގެ އިދާރާގެ މީޑިއާ އޮފިޝަލަކު ވިދާޅުވީ މަޖިލީހުގެ ރައީސްގެ ސިއްހީ ހާލު ގޯސްވެ ހޮސްޕިޓަލުގައި އެޑްމިޓުކޮށްގެން ފަރުވާ ދިނުމަށްފަހު، އެމަނިކުފާނުގެ ހާލު ސްޓޭބަލް ވުމުން މިރޭ ހޮސްޕިޓަލުން ގެކޮޅަށް ބަދަލުކޮށްފައިވާ ކަމަށެވެ.
ހިތުގެ އާލާސްކަންފުޅު ހުންނަ އަބްދުއްރަހީމްގެ ހިތުގެ ހިނގުން ރަނގަޅު ކުރަން ހުންނަނީ ޕޭސްމޭކަރެއް ލައްވައިފަ އެވެ. މީގެ ކުރިން ވެސް އެކި ފަހަރު މަތިން އެ ބައްޔަށް ފަރުވާ ހޯއްދަވާފައިވެ އެވެ.
ޕޭސްމޭކާ ލައްވަނީ ހިތުގެ ހިނގުން އެކަށީގެންވާ މިންވަރެއްގައި ނުހިފެހެއްޓޭނަމަ އެ ކަން ކޮންޓްރޯލްކޮށް، އެއްވަރެއްގައި ހިފެހެއްޓުމަށެވެ. އެއީ މޭގައި ނުވަތަ ބަނޑާ ހިސާބުގައި ހަރުކުރާ ކުޑަ އިލެކްޓްރޯނިކް ޑިވައިސެކެވެ.
މަޖިލީހުގެ މިއަދު ޖަލްސާގައި ވެސް ރިޔާސަތުގައި އިންނެވީ އަބްދުއްރަހީމް އެވެ.
އަބްދުއްރަހީމަކީ މިވަގުތު ރާއްޖޭގެ ސިޔާސީ މަސްރަހުގައި ހަރަކާތްތެރިވާ ބޭފުޅުންނަށް ބަލާއިރު އެންމެ ތަޖުރިބާކާރު އަދި އެންމެ ނުފޫޒުގަދަ ބޭފުޅުންގެ ތެރޭގައި ހިމެނޭ ބޭފުޅެކެވެ.
