ސާޖިދާ މިހެން ވިދާޅުވީ މޭކް ފައުންޑޭޝަން އެފްރިކާ އޭޝިއާ ލޫމިނަރީ ކޮންފަރެންސްގެ 11 ވަނަ އަހަރީ ބައްދަލުވުމުގައި ބޭއްވި ހައިލެވެލް ފަސްޓް ލޭޑީސް ޕެނަލްގެ ޝަރަފުވެރި މެހުމާންގެ ހައިސިއްޔަތުން ވާހަކަ ދައްކަވަމުންނެވެ.
ސާޖިދާގެ ވާހަކަފުޅުގައި ވަނީ ސިއްހީ ހިދުމަތާއި، އަންހެނުން ބާރުވެރިކުރުވުމާއި، ތައުލީމު ކުރިއެރުވުމުގައި ބައިނަލްއަގްވާމީ ފެންވަރުގައި އެއްބާރުލުން ދިނުމުގެ މުހިންމުކަމުގެ މައްޗަށް ވަކާލާތުކުރައްވަފައެވެ.
މޭކް ފައުންޑޭޝަނުން ކުރިއަށް ގެންދާ "މޯ ދޭން އަ މަދާ" ކެމްޕެއިން ހަރަކާތްތަކަށް ތައުރީފު ކުރައްވާ ވާހަކަ ދައްކަވަމުން ސާޖިދާ ވިދާޅުވީ ދަރިމައިވުމުގެ މައްސަލައަކީ ރާއްޖޭގައި އަދިވެސް ވަރަށް ހައްސާސް ކަމެއް ކަމަށެވެ. އެހެންނަމަވެސް އެއާ އެކުގައިވެސް އަންހެނުންނަކީ މުޖުތަމައު ބިނާ ކުރުމުގެ ބޮޑު ޒިންމާއެއް ކޮނޑުގައިއަޅައިގެން އުޅެމުންދާ ބައެއްކަން ސާޖިދާ ފާހަގަކުރެއްވިއެވެ.
އާސަންދަ ޕަބްލިކް ހެލްތު އިންޝުއަރެންސް ސްކީމްގެ ތެރެއިން ފަރުވާ ފޯރުކޮށްދީ، އައިވީއެފް ފަދަ އެސިސްޓެޑް ރިޕްރޮޑަކްޓިވް ޓެކްނޮލޮޖީސް (އޭއާރްޓީ) އިތުރަށް ފަސޭހަކޮށްދިނުމަށް މި ސަރުކާރުން މަސައްކަތް ކުރާކަން ސާޖިދާ ފާހަގަކުރެއްވިއެވެ.
"މޯ ދޭން އަ މަދާ" ކެމްޕެއިން ރާއްޖެއަށް ތަޢާރަފްކަން ބޭނުންވާކަމަށް ވިދާޅުވެ، ސާޖިދާ ވިދާޅުވީ މި ކެމްޕެއިންގެ ސަބަބުން ދަރިމައިވުމާ މެދު މުޖުތަމަޢުގެ ވިސްނުން އަދު ހުރި ގޮތް ބަދަލުވެ، ހިތްދަތިކަން ތަހައްމަލު ކުރަމުންދާ ފަރާތްތަކަށް އެހީތެރިކަން ފޯރުކޮށްދިނުމަށް މަގުފަހިވެގެންދާނެކަމަށެވެ. މީގެއިތުރުން ކެންސަރުން ރައްކާތެރިވުމާއި ފަރުވާ ދިނުމާއި ތައުލީމު ކުރިއެރުވުމާއި އެންމެންނަށް ހަމަހަމަ ފުރުސަތުތައް ފަހިކޮށްދިނުން ފަދަ މުހިންމު ކަންކަމުގެ މައްޗަށްވެސް ސާޖިދާ ވަނީ މި ބައްދަލުވުމުގައި ވާހަކަ ދައްކަވާފައެވެ.
