ފިނޭންސް މިނިސްޓްރީން ބުނީ މިއަހަރުގެ މިހާތަނަށް ދައުލަތަށް 28.2 ބިލިއަން ރުފިޔާ ލިބިފައިވާ އިރު، މިދިޔަ އަހަރުގެ މި މުއްދަތުގައި ލިބިފައިވަނީ 27.7 ބިލިއަން ރުފިޔާ އެވެ. މިއަހަރު ލިބުނު އާމްދަނީގެ ތެރޭގައި ޓެކްސްގެ ގޮތުގައި 21.4 ބިލިއަން ރުފިޔާ އާއި އެހެނިހެން އާމްދަނީގެ ގޮތުގައި 6.1 ބިލިއަން ރުފިޔާ ހިމެނެ އެވެ.
ނަމަވެސް މިއަހަރުގެ މިހާތަނަށް ދައުލަތުން ވަނީ 37 ބިލިއަން ރުފިޔާ ހަރަދުކޮށްފަ އެވެ. އޭގެ ތެރޭގައި މުސާރަ އާއި އިނާޔަތްތަކަށް 10 ބިލިއަން ރުފިޔާ ހަރަދުކޮށްފައިވާ އިރު، މިދިޔަ އަހަރުގެ މި މުއްދަތުގައި މުސާރަ އާއި އިނާޔަތްތަކަށް ހަރަދުކުރީ 8.9 ބިލިއަން ރުފިޔާ އެވެ.
ފިނޭންސް މިނިސްޓްރީން ބުނީ މުސާރައަށް ކުރާ ހަރަދު އިތުރުވެފައި ވަނީ ސިފައިންނާއި ފުލުހުންނާއި އަދި ކުރިން މުސާރަ އެއްގޮތްކުރި އެހެނިހެން ދާއިރާތަކުގެ މުސާރައަށް އައި ބަދަލުތަކާ ގުޅިގެން ކަމަށެވެ. އަދި މިދިޔަ އަހަރާ އަޅާބަލާއިރު މުޅި ހަރަދަށް އިތުރުވެފައި ވަނީ 700 މިލިއަން ރުފިޔާ ކަމަށް އެ މިނިސްޓްރީން ބުންޏެވެ.
