ގަލޮޅު ދެކުނު ދާއިރާގެ މެންބަރު މީކާއިލް ނަސީމް ހުށަހެޅުއްވި މި މައްސަލަ ބޭރުކޮށްލުމަށް 46 މެންބަރުން ވޯޓު ދިން އިރު، މައްސަލަ ބަލައިގަތުމަށް ވޯޓު ދިނީ 10 މެންބަރުންނެވެ. ޖުމުލަ 56 މެންބަރުން މިއަދުގެ ވޯޓުގައި ބައިވެރިވި އެވެ.
މީކާއިލް ވިދާޅުވީ ގުޅީފަޅުން ގޯތި ލިބޭ ފަރާތްތަކަށް ޕްލޮޓް ހަމަޖެއްސުމަށް ގުރުއަތު ނެގުން ފެށީ ގޯތީގެ ހައްގުވެރިންނަށް އެންގުމަކާ ނުލައި ކަމަށެވެ. އަދި މިނިސްޓްރީގެ އޮފިޝަލުން އެކަނި ގުރުއަތު ނެގުމަށް ހަމަޖެއްސުމަކީ ކޮރަޕްޝަނަށް މަގުފަހިވާނެ ކަމެއް ކަމަށް ވެސް ވިދާޅުވި އެވެ.
މީގެ އިތުރުން، ގެދޮރުވެރިޔާ މަޝްރޫއުގެ ދަށުން ފްލެޓް ލިބޭ މީހުންގެ ދާއިމީ ލިސްޓު އާންމުކުރުމަށް ތަފާތު ތާރީހުތައް ދެމުންދާ ކަމަށް ވެސް މީކާއިލް ވަނީ ފާހަގަކުރައްވާފަ އެވެ. އަދި މިކަމާ ގުޅިގެން ރައްޔިތުންގެ މެދުގައި ނުތަނަވަސްކަން އުފެދި، އެތައް ހާސް ރައްޔިތުންގެ ބޯހިޔާވަހިކަމުގެ ހައްގަށް އުނިކަން އަންނާނެ ކަމަށް ވެސް ވިދާޅުވި އެވެ.
