މިގޮތުން ފާޑުކިޔާ މީހުން ބުނަނީ މިސް ޔުނިވާސް މުބާރާތަކީ "އަންހެނުން ބަރަހަނާކޮށް ދައްކާ" މުބާރާތެއް ކަމަށެވެ. އަދި އެ މުބާރާތުގައި ބައިވެރިވާ ފަރާތްތަކަށް ވެސް ވަނީ ފާޑުކިޔައިފަ އެވެ. ބައެއް އިލްމުވެރިން ވަނީ އެފަދަ މީހުންނަށް "ނަރަކަ ހައްގު" ކަމަށް ވެސް ބުނެފައެވެ.
ރާއްޖެއިން މި މުބާރާތުގައި ބައިވެރިވާ 21 އަހަރުގެ ޝައިނާއަށް އަމާޒުކޮށް ބައެއް ފަރާތްތަކުން ފާޑުކިޔަމުން ދިޔަ ނަމަވެސް، ގިނަ ބަޔަކު ވަނީ އޭނާއަށް ތާއީދުކޮށް އެއްބާރުލުން ވެސް ދީފައިކަން ފާހަގަކޮށްލެވެއެވެ.
ދިވެހި ސަރުކާރު ވެސް ދިވެއްސަކު މި މުބާރާތުގައި ބައިވެރިވުމާ ދެކޮޅު:
ދިވެހި ސަރުކާރުން މިއަދު ނެރުނު ބަޔާނެއްގައި ބުނެފައިވަނީ މިސް ޔުނިވާސް މުބާރާތުގައި ދިވެހިން ބައިވެރިވުމަކީ ސަރުކާރުން ބަލައިގަންނަ ކަމެއް ނޫން ކަމަށެވެ.
ޔޫތު މިނިސްޓްރީން ނެރުނު ބަޔާނުގައި ބުނެފައިވަނީ އިސްލާމް ދީނާ ހިލާފު އެއްވެސް ކަމަކަށް ސަރުކާރުން ތަރުހީބު ނުދޭ ކަމަށެވެ. އަދި މިފަދަ ކަންކަން ހުއްޓާލުމަށް އެ ފަރާތްތަކަށް އިލްތިމާސް ކޮށްފައިވެއެވެ.
މިސް ޔުނިވާސްގެ 73 ވަނަ މުބާރާތުގައި ރާއްޖެ ތަމްސީލުކުރުމަށް ހަމަޖެހިފައިވަނީ ޓޮޕް މޮޑެލް މޯލްޑިވްސް 2022 ކާމިޔާބުކުރި 21 އަހަރުގެ މަރިޔަމް ޝައިނާ ނަސީމެވެ. މި މުބާރާތް އޮންނާނީ އަންނަ މަހުގެ 14 އިން 16 އަށް މެކްސިކޯގައެވެ.
މި އަހަރުގެ މުބާރާތުގައި 130 ގައުމަކުން ބައިވެރިވާއިރު، ރާއްޖޭގެ އިތުރުން އެމިރޭޓްސް، ސޯމާލިއާ، ބެލަރޫސް، އިރާން އަދި އުޒްބަކިސްތާނަކީވެސް މި މުބާރާތުގައި އަލަށް ބައިވެރިވާ ގައުމުތަކެވެ.
