ޕީޖީ އޮފީހުން ބުނީ އެންމެ ފުރަތަމަ މައްސަލަ ހުށަހެޅުމުން، ޖިހާދު ރާއްޖޭގައި ނެތުމާ ގުޅިގެން އޭނާއަށް ޗިޓު ރައްދު ނުކުރެވުމުން، އަލުން މައްސަލަ ހުށަހެޅުމަށް 15 ދުވަހުގެ މުއްދަތެއް ކޯޓުން ދިން ކަމަށެވެ. ނަމަވެސް ޖިހާދު ރާއްޖެ އައުމުން މައްސަލަ ހުށަހެޅީ ކޯޓުން ދިން މުއްދަތު ހަމަވިތާ ދެ ދުވަސް ފަހުން ކަމަށް ވެސް އެ އޮފީހުން ބުންޏެވެ.
ހައި ކޯޓުގެ ރަޖިސްޓްރާ މައްސަލަ ބޭރުކޮށްލީ މުއްދަތު ހަމަވުމަށްފަހު ހުށަހެޅި ކަމަށް ބުނެ އެވެ. އެހެންނަމަވެސް ޕީޖީ އޮފީހުން މުއްދަތު އިތުރުކޮށްދިނުމަށް އެދުނު ކަމަށާއި، އެކަމަކު މައްސަލަ ރަޖިސްޓްރީ ނުކޮށްދިން ކަމަށް އެ އޮފީހުން މައުލޫމާތު ދިނެވެ.
މިހާރު ޕީޖީ އޮފީހުން ވަނީ ރަޖިސްޓްރާގެ ނިންމުން ބަދަލުކޮށްދިނުމަށް އެދި ފަނޑިޔާރުންގެ މަޖިލީހަށް ހުށަހަޅާފައެވެ. އަދި މި މައްސަލައިގައި ކުރިއަށް އޮތް ތަނުގައި ގޮތެއް ނިންމާނީ ފަނޑިޔާރުންގެ މަޖިލީހުން ކަމަށް ވެސް އެ އޮފީހުން ބުންޏެވެ.
