ޓްރާންސްޕޯޓް މިނިސްޓްރީން އެކުލަވައިލި "މާލެ ފެހި" ޕްރޮގްރާމްގެ ދަށުން ސަރުކާރުން ޓެކްސީގެ ވިޔަފާރީގެ ތެރެއަށް ވަނުމަށް ނިންމި ނިންމުމާ ގުޅިގެން ޑްރައިވަރުންގެ ޖަމިއްޔާއިން މިއަދު ކޮމިޓީއަށް ހާޒިރުވެ ވަނީ އެކަމުގެ ކަންބޮޑުވުން ފާޅުކޮށްފަ އެވެ.
ޑްރައިވާސް އެސޯސިއޭޝަންގެ މެންބަރު ހަސަން ޒަރީރު ބުނީ މިއީ އެ މީހުންގެ ދިރިއުޅުމާ ސީދާ ގުޅިފައިވާ ކަމަކަށް ވާއިރު، މި ނިންމުން ބަދަލުކޮށްދިނުމަށް މަސައްކަތްކޮށްދިނުމަށް އެދޭ ކަމަށެވެ. އަދި މިދިޔަ އޮގަސްޓް މަހު ޓްރާންސްޕޯޓް މިނިސްޓަރު މުހައްމަދު އަމީން ޑްރައިވަރުންނާ ބައްދަލުކޮށް، ސަރުކާރުން ޓެކްސީގެ ހިދުމަތުގެ ތެރެއަށް ނުވަންނާނެ ކަމަށް ވިދާޅުވެފައިވާ ކަމަށް ވެސް އޭނާ ބުންޏެވެ.
ޒަރީރު ބުނީ ސަރުކާރުން އެކަމުގެ ތެރެއަށް ވަދެއްޖެ ނަމަ ޓެކްސީ ހިދުމަތް ދެމުން އަންނަ ކުންފުނިތަކުން ކޮށްފައިވާ އިންވެސްޓްމަންޓްތަކަށް ވެސް ހުރަސްއެޅި، އެ މީހުންގެ ވިޔަފާރިތަކަށް ބޮޑެތި ގެއްލުންތަކެއް ވާނެ ކަމަށެވެ.
އެހެން ނަމަވެސް ޓްރާންސްޕޯޓް މިނިސްޓަރު އަމީން ވިދާޅުވީ އެކަމުގެ ތެރެއަށް ސަރުކާރުން ވަދެ، އުސޫލުތަކާއި ގާނޫނުތަކެއް ހަދައިގެން ކޮންޓްރޯލް ނަގަން ޖެހޭ ކަމަށެވެ. އެކަން ނުކޮށްފި ނަމަ ވެހިކަލްތަކުން މާލެ "ބަންޑުންވާ" ހިސާބަށް ދާނެ ކަމަށާއި މިހާރު ވެސް ރައްކާތެރިކަން ގެއްލިފައިވާ ކަމަށް އޭނާ ވިދާޅުވި އެވެ.
