ބަންދާރަ ނައިބު އަހްމަދު އުޝާމް ވިދާޅުވީ ސަރުކާރުގެ ފަރާތުން ގާނޫނު އަސާސީއަށް އިސްލާހުތައް ގެންނަން ނިންމާފައިވާކަމަށާއި އެ އިސްލާހުތައް ގެންނާނީ ފޭސް ތަކަކަށް ބަހާލައިގެންކަމަށެވެ.
އުޝާމް ވިދާޅުވީ ގާނޫނު އަސާސީއަށް ގެންނަ އިސްލާހުތަކުގެ ތެރޭގައި ރިޔާސީ ދައުރު ފަށާ ދުވަސް ގާނޫނުގައި ލިޔަން ނިންމާފައިވާކަމަށެވެ. އެގޮތުން ރިޔާސީ ދައުރު ފަށާ ދުވަހަކީ ނޮވެމްބަރު 11 ކަމަށް ކަނޑައަޅާ އެގޮތަށް ގާނޫނު އަސާސީ އިސްލާހު ކުރާނެކަން ބަންޑާރަ ނައިބު ފާހަގަކުރެއްވިއެވެ. އުޝާމް ވިދާޅުވީ މި ފަދަ އިސްލާހުތައް ގެނެވޭނީ ރައްޔިތުންގެ ހިޔާލުވެސް ހޯދައިގެންކަމަށެވެ.
ކުރިން ނޮވެމްބަރު މަހުގެ 11 ވަނަ ދުވަހު ފަށަމުން އައި ރިޔާސީ ދައުރު ފަށާ ދުވަސް ބަދަލުވީ 2013 ވަނަ އަހަރު ރިޔާސީ އިންތިހާބުގެ ފުރަތަމަ ބުރު ސުޕްރީމް ކޯޓުން ބަދަލުކުރުމުން ދެވަނަ ފަހަރަށް ވޯޓްލާން ޖެހުމުން އެ އަހަރުގެ ރިޔާސީ އިންތިހާބުގެ ވޯޓް ނިންމާ ނޮވެމްބަރު 11 އަށް ރައީސަކު އިންތިހާބު ނުކުރެވުމުގެ ސަބަބުންނެވެ.
އޭގެ ފަހުން 2013 ވަނަ އަހަރު ރައީސް ޔާމީންނާއި 2018 ވަނަ އަހަރު ރައީސް އިބްރާހިމް މުހައްމަދު ސާލިހް ރައީސްކަމުގެ ހުވާކުރެއްވީ ނޮވެމްބަރު 17ގައެވެ.
