މި ރަސްމިއްޔާތު ބާއްވަން ހަމަޖެހިފައިވަނީ ނޮވެމްބަރު 6 ވަނަ ދުވަހުގެ ރޭ ޒުވާނުންގެ މަރުކަޒުގައެވެ.
މި ރަސްމިއްޔާތުގައި ރައީސުލްޖުމްހޫރިއްޔާ އާއި ސަރުކާރުގެ އިސް ވެރިން ބައިވެރިވާނެއެވެ. މާސްޓާ ޕްލޭންގެ މަސައްކަތް 12 މަސް ދުވަހުގެ ތެރޭގައި ނިންމުމަށް ވަނީ ކެބިނެޓުން ނިންމާފަ އެވެ.
މި މަޝްރޫއުގެ މައި އިދާރާއަކީ ހައުސިން މިނިސްޓްރީ އެވެ. މަސައްކަތް ކުރިއަށްދާ ގޮތުގެ މައުލޫމާތު ކޮންމެ ދެ ހަފުތާއަކުން އެއްފަހަރު ރައީސް އަށް އަދި ކޮންމެ ދެ މަހަކުން އެއްފަހަރު ކެބިނެޓަށް ހުށަހަޅަން ޖެހޭނެ އެވެ.
މާސްޓާ ޕްލޭންގެ މަސައްކަތަށް ކަނޑައަޅާފައިވާ ފައިސާގެ އިތުރުން، ސަރުކާރު ހިއްސާވާ ކުންފުނިތަކުން އެހީތެރިކަން ހޯދުމަށް ވެސް ވަނީ ނިންމާފަ އެވެ. މިގޮތުން އެ ކުންފުނިތަކުގެ ކޯޕަރޭޓް ސޯޝަލް ރެސްޕޮންސިބިލިޓީގެ ދަށުން އެހީތެރިކަން ހޯދުމަށް މަސައްކަތް ކުރާނެ އެވެ.
ކެބިނެޓުން ނިންމާފައިވާ ގޮތުގައި މި މާސްޓާ ޕްލޭންގެ މައިގަނޑު އަސާސަކީ ލޮލަށް ފެންނަ ތަރައްގީ އާއި ގައުމިއްޔަތު ދިރުވުމެވެ. އަދި މި ޕްލޭންގައި ހިމެނޭ މައިގަނޑު އަސާސްތައް ގާނޫނުއަސާސީގައި ހިމަނައި، އެކަމަށް ހާއްސަ ގާނޫނެއް ހެދުމަށް ވެސް ވަނީ ނިންމާފަ އެވެ.
މާސްޓާ ޕްލޭން ފެށުމުގެ ކުރިން، ސަރުކާރުގެ ތަސައްވުރު ރައްޔިތުންނަށް އަންގައިދިނުމަށް ބޮޑު މަހާސިންތާއެއް ބޭއްވުމަށް ވެސް ވަނީ ނިންމާފަ އެވެ. ނަމަވެސް އެ މަހާސިންތާ ބާއްވާނެ ތާރީހެއް އަދި ހާމަކޮށްފައެއް ނުވެ އެވެ.
