މި އިވެންޓް އޮންނާނީ ޑިސެމްބަރު 20 ވަނަ ދުވަހު ހުޅުމާލޭގައެވެ.
އުރީދޫން ބުނީ މި އިވެންޓުގައި ބައިވެރިވެވޭނީ ހަ އަހަރުން މަތީގެ ކޮންމެ މީހަކަށް ކަމަށެވެ. އަދި ރަޖިސްޓްރީ ކުރެވޭނީ އަންނަ މަހުގެ 16 ގެ ނިޔަލަށް ކަމަށް ވެސް އެ ކުންފުނިން ބުނެފައި ވެ އެވެ.
ފަން ރަން ކިޓްތައް ވިއްކަން ހުންނާނީ ދެ ކެޓަގަރީއަކަށް ބަހާލައިގެންނެވެ. އެގޮތުން 100 ރުފިޔާގެ ސްޓޭންޑަޑް ކިޓުގައި ޓީޝާޓާއި ރިސްޓްބޭންޑް ހިމެނޭ އިރު، 210 ރުފިޔާގެ ފަން ކިޓުގައި އިތުރު ތަކެތި ހިމެނެ އެވެ. 210 ރުފިޔާގެ ފަން ކިޓުގައި ހިމެނެނީ ފަން ރަން ޓީޝާޓާއި ރިސްޓްބޭންޑާއި ފޮތި ކޮތަޅާއި ލޮލުގައި އަޅާ ގޮގްލްސް އަދި މަލްޓިޕާޕަސް ބަނޑާނާ އެވެ.
ފަސް ކިލޯމީޓަރުގެ މި ދުވުމަކީ ވަކި ވަގުތެއްގެ ތެރޭގައި ނިންމަން ޖެހޭ ރޭހެއް ނޫނެވެ. އެހެންކަމުން ހިނގާފައި، ޖޮގްކޮށްފައި، ދުވެފައި ނުވަތަ ނަށަމުން ވެސް މި ދުވުން ނިންމިދާނެ ކަމަށް އުރީދޫން ބުނެފައި ވެ އެވެ.
މި އަހަރުގެ ދުވުމުގައި ވެސް ކޮންމެ ކިލޯމީޓަރެއް ދުވެ ނިމުމުން، ސްޓޭޝަންތަކުގައި ކުލަ އެޅުމާއި، ފެން ފޯރުކޮށްދިނުމާއި، ފޯމް އެޅުމުގެ އިތުރުން އެހެނިހެން މަޖާ ހަރަކާތްތައް ހިމެނޭނެ ކަމަށް އުރީދޫން ބުނެފައި ވެ އެވެ.
އުރީދޫން ބުނީ މި ދުވުމަކީ ތަޖުރިބާކާރު ދުވުންތެރިންނާއި އަލަށް ދުވަން ފަށާ މީހުންނަށް ވެސް ބައިވެރިވެވޭނެ ހަރަކާތެއް ކަމަށެވެ. އަދި އާއިލާ އާއި ރައްޓެހިންނާ އެކު އުފާވެރި ވަގުތުކޮޅެއް ހޭދަކޮށްލަން ބޭނުންވާ އެންމެންނަށް ވެސް ބައިވެރިވެވޭނެ ކަމަށް އެ ކުންފުނިން ބުނެފައި ވެ އެވެ.
އުރީދޫ ފަން ރަން އަކީ ކޮންމެ އަހަރަކު އެ ކުންފުނިން ބާއްވަމުން އަންނަ ހަރަކާތެކެވެ. މި ހަރަކާތް އަމާޒުކޮށްފައި ވަނީ މުޖުތަމައުގެ ހުރިހާ އުމުރުފުރައެއްގެ މީހުންނަށް ކަމަށް އުރީދޫން ބުނެފައި ވެ އެވެ.
