ގުޅިފަޅުން މިހާރު ދޫކުރަން ނިންމާފައިވަނީ 3،520 ގޯއްޗެވެ. މީގެ ތެރޭގައި ގިރާވަޅު ފަޅުން ލިބުނު ގޯތި ގުޅިފަޅަށް ބަދަލުކުރި ފަރާތްތައް ވެސް ހިމެނެ އެވެ. ހައުސިން މިނިސްޓްރީން މިހާރު ވަނީ ފޯމު ނަންބަރާއި ލޮޓް ނަންބަރު އަދި ގޯތިތަކުގެ ބޮޑުމިނުގެ ތަފްސީލު ހިމެނޭ ލިސްޓެއް އާންމުކޮށްފަ އެވެ.
ގުޅިފަޅުން މިހާރު ދޫކުރާ ގޯތިތަކުގެ ތެރޭގައި 1،250 އަކަފޫޓުގެ 669 ގޯއްޗާއި، 1،650 އަކަފޫޓުގެ 1،234 ގޯތި ހިމެނެ އެވެ. މީގެ އިތުރުން 2،050 އަކަފޫޓުގެ 916 ގޯއްޗާއި، 2،450 އަކަފޫޓުގެ 473 ގޯތި ވެސް ހިމެނެ އެވެ. އަދި 2،850 އަކަފޫޓުގެ 158 ގޯއްޗާއި، 3،250 އަކަފޫޓުގެ 49 ގޯއްޗާއި، 3،650 އަކަފޫޓުގެ 21 ގޯތި ހިމެނެ އެވެ.
ހައުސިން މިނިސްޓްރީން ބުނީ ޝަކުވާ ހުށަހަޅަން ބޭނުންވާ ފަރާތްތަކަށް ހިޔާވެހި ޕޯޓަލް މެދުވެރިކޮށް އެ ފުރުސަތު ލިބޭނެ ކަމަށެވެ. އަދި ކުރީ ސަރުކާރުން ގޯތި ލިބުނު ފަރާތްތަކަށް ގޯތީގެ ރަޖިސްޓްރީ ހަވާލުކޮށްފައި ވީނަމަވެސް، އާ ލޭންޑް ޔޫސް ޕްލޭނާ އެއްގޮތަށް ގޯތި ދޫކުރާ ސަރަހައްދުތަކަށް ބަދަލު ގެނެސްފައިވާ ކަމަށް ވެސް މިނިސްޓްރީން ބުންޏެވެ.
ގުޅިފަޅުން 150 ހެކްޓަރުގެ ބިން ހިއްކުމުގެ މަސައްކަތް މި އަހަރު ވަނީ ނިމިފަ އެވެ. އަދި އިތުރު 85 ހެކްޓަރުގެ ބިން ހިއްކުމަށް ސަރުކާރުން ވަނީ ނިންމައިފަ އެވެ. އެހެންނަމަވެސް އިތުރަށް ބިން ހިއްކުމަށް ބޭނުންވާ ފައިސާ އަދި ހަމަޖެހިފައި ނުވާ ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ވިދާޅުވި އެވެ.
