ހުޅުމާލޭ ސެންޓްރަލް ޕާކްގައި ނޮވެންބަރު 15 އިން 16 އަށް ކުރިޔަށް ގެންދާ މި އެކްސްޕޯއަކީ ޒުވާނުންނަށް ކުރިމަގުގައި ހުރި ވަޒީފާގެ ފުރުސަތުތަކާއި، ވަޒިފާއަކަށް ތައްޔާރުކޮށް ދިނުމަށް އަމާޒުކޮށްގެން ބޭއްވޭ ހަރަކާތެއްކަމަށް ހަޔާ އެޑިއުކޭޝަން މިނިސްޓްރީން ބުނެއެވެ.
މި އެކްސްޕޯގައި ކޮލެޖުތަކާއި، އިންސްޓިޓިއުޓްތަކާއި، ސަރުކާރުގެ ހިއްސާވާ ކުންފުނިތަކާއި، އިންޑަސްޓްރީގެ ބައިވެރިންނާއި އަދި އެކި މިނިސްޓްރީތަކުގެ ޑިޕާޓްމަންޓްތަކުން 45 އަށްވުރެ ގިނަ ސްޓޯލް ބައިވެރިވާނެކަމަށް ހަޔާ އެޑިއުކޭޝަނުން ފާހަގަކުރެއެވެ.
މި އެކްސްޕޯގައި އެކި ދާއިރާތަކުން ފާހަގަކޮށްލެވޭ ބޭފުޅުންގެ މަޝްވަރާ ބައްދަލުވުންތައް ކުރިއަށް ގެންދާނެއިރު މި ބައްދަލުވުންތަކުގައި ވަޒީފާގެ ދާއިރާގައި ކުރިއަށްދިއުމަށް ބޭނުންވާ އަގުހުރި މައުލޫމާތު ދޭނެއެވެ. އަދި ބައިވެރިންނަށް ވަޒީފާގެ ފުރުސަތުތަކާއި އެ ފުރުސަތުތަކަށް ވާސިލުވުމަށް ބޭނުންވާ ރަނގަޅު މަގުތަކާ ބެހޭ ސާފު މައުލޫމާތު ލިބިގެންދާނެކަމަށްވެސް ހަޔާ އެޑިއުކޭޝަން މިނިސްޓްރީން ބުނެއެވެ.
މިއީ ދަރިވަރުންނާއި ޒުވާން ޕްރޮފެޝަނަލުންނަށް އިންޓަރެކްޓިވް ސެޝަންތަކާއި، މައުލޫމާތު ފެތުރުމާއި، ލައިވް ޑެމޮންސްޓްރޭޝަންތަކާއި އަދި ޝައުގުވެރިކަން ހުރި ހަރަކާތްތަކުގެ ތެރެއިން އެކި ވައްތަރުގެ ވަޒީފާގެ މަގުތައް ދެނެގަތުމަށް ލިބޭ ފުރުސަތެއްކަން ހަޔާ އެޑިއުކޭޝަމް މިނިސްޓްރީން ފާހަގަކުރެއެވެ.
މި އެކްސްޕޯއަކީ މަތީ ތައުލީމުގެ ފުރުސަތުތައް ދައްކުވައިދޭ ހަމައެކަނި ތަނެއް ނޫންކަމަށާއި އޭގެ އިތުރުން އެއީ ހުނަރު ތަރައްގީކުރުމަށާއި ވަޒީފާގެ ދާއިރާގައި ކުރިއަށްދިއުމަށް އަމާޒުކޮށްފައިވާ މުހިންމު ތަނަކަށް ވާނެކަމަށް މިނިސްޓްރީން ފާހަގަކުރެއެވެ.
