އިލެކްޝަން ކޮމިޝަނާއި އެންޓި ކޮރަޕްޝަން ކޮމިޝަންގެ ރައީސާއި ނާއިބު ރައީސް، ރައީސުލްޖުމްހޫރިއްޔާ އައްޔަނު ކުރައްވާ ގޮތަށް ސަރުކާރުގެ ފަރާތުން ވަނީ ރައްޔިތުންގެ މަޖިލީހަށް އިސްލާހެއް ހުށަހަޅައިފަ އެވެ. މި އިސްލާހާ ގުޅިގެން އިދިކޮޅުގެ ފާޑުކިޔުން ސަރުކާރަށް ވަނީ އަމާޒުވެފަ އެވެ.
އެ އިސްލާހުތަކަށް އިދިކޮޅުގެ ފާޑުކިޔުން އަމާޒުވެފައިވަނިކޮށް ރައީސް މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ މިނިވަން މުއައްސަސާއެއްގެ ތެރެއަށް ނުފޫޒު ފޯރުވުމަކީ އެމަނިކުފާނު އެއްވެސް އިރަކު ކުރެއްވި ކަމެއް ނޫން ކަމަށާއި އެފަދަ ކަމެއް ނުކުރައްވާނެ ކަމަށެވެ.
ޓްރާންސްޕޭރެންސީން ހުކުރު ދުވަހު ނެރުނު ބަޔާނެއްގައި ބުނީ މި މުއައްސަސާތަކުގެ އެންމެ އިސް ފަރާތްތައް ހުށަހެޅުމުގެ ސީދާ ރައީސުލްޖުމްހޫރިއްޔާ އަށް ދެވުމުން، ވަކި ސިޔާސީ މަންފާއެއް ހާސިލުކުރުމަށްޓަކާ އެ ފަރާތްތައް އައްޔަންކުރުމަށާއި އަދި ގާބިލު ފަރާތްތައް ނާއިންސާފުވެރި ގޮތެއްގައި ބާކީ ކުރުމަށް މަގުފަހިވެގެން ދިޔުމުގެ ފުރުސަތު ބޮޑުވެގެންދާނެ ކަމަށެވެ.
މިނިވަން މުވައްސަސާތަކަށް މެންބަރުން އައްޔަންކުރުމުގައި އެ މުވައްސަސާތައް ހިންގުމުގައި ޒިންމާދާރު، އަދި ޝަރުތުތައް ހަމަވާ ބައެއްކަން ކަށަވަރުކުރުމަށް، ހާމަކަން ބޮޑު އުސޫލެއް ބަޔާންކޮށްފައި ވަނިކޮށް، އެތަންތަނުގެ ރައީސުންނާއި ނާއިބުރައީސުން ކަނޑައެޅުމުގެ ބާރު ރައީސަށް ދިނުމަކީ، ސިޔާސީ މަންފާތައް ހާސިލްކުރުމަށް ވަކި ފަރާތެއް މަގާމަށް އިސްކޮށް، އެ މަގާމުތަކަށް ގާބިލް މީހުންނާ މެދު ބޭއިންސާފުން އަމަލުކުރުމަށް ފުރުސަތު ލިބޭނެ ކަމެއްކަން ޓްރާންސްޕޭރެންސީގެ ބަޔާނުގައި ފާހަގަކުރި އެވެ.
މިކަމުގެ ސަބަބުން މުވައްސަސާތަކުގެ މިނިވަންކަން ގެއްލި، ރައްޔިތުންނަށް އެ މުވައްސަސާތައް ޖަވާބުދާރީ ކުރުވުމަށް ހުރަސް އެޅިދާނެކަން އެޖަމިއްޔާއިން ފާހަގަކުރެ އެވެ.
ޓްރާންސްޕޭރެންސީން ބުނީ މިނިވަން މުއައްސަސާތަކަށް މެމްބަރުން އައްޔަންކުރަން ވާނީ ހާމަކަންބޮޑު، އެ ފަރާތްތަކުގެ ފަންނީ ގާބިލުކަމާއި ނަޒާހަތްތެރިކަމަށް ރިއާޔަތްކުރެވި، ސަރުކާރުގެ ސިޔާސީ ނުފޫޒުން މިނިވަން ވެފައިވާ އުސޫލެއްގެ ދަށުން ކަމަށެވެ.
މިފަދަ ހަރުދަނާ އުސޫލުތައް ތައާރަފް ކުރެވިއްޖެނަމަ މިފަދަ މުހިއްމު މަގާމުތައް އައްޔަންކުރުމުގައި ހާމަކަން އިތުރުވެ، ވަކި ފަރާތަކަށް ބުރަވުން ކުޑަވެގެންދާނެ ކަމަށްވެސް ބުނެފައިވެ އެވެ.
