މިކަން ހާމަކުރެއްވީ މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގު ހަލީމެވެ.
ރައީސް ޑރ. މުހައްމަދު މުއިއްޒުގެ ފުރަތަމަ 14 ހަފުތާގެ ވައުދުތަކުގެ ތެރޭގައި ހިމެނޭ، ކޮންމެ ދިވެހި ރައްޔިތަކަށް އަހަރަކު ދެ ފަހަރު އާސަންދަ ސްކީމްގެ ދަށުން މެޑިކަލް ޗެކްއަޕް ހެދޭނެ އިންތިޒާމު ހަމަޖެއްސުމުގެ ވައުދާ އެއްގޮތަށް މި އަހަރުގެ ޖުލައި މަހުން ފެށިގެން މި ފުރުސަތު ވަނީ ހުޅުވާލާފައެވެ.
އައިޖީއެމްއެޗާއި ދަރުމަވަންތަ ހޮސްޕިޓަލާއި ހުޅުމާލެ ހޮސްޕިޓަލް އަދި ވިލިމާލެ ހޮސްޕިޓަލުން މި ޚިދުމަތް ދެމުން ގެންދާއިރު، މިހާތަނަށް 1336 މީހުން މެޑިކަލް ޗެކްއަޕް ހަދާފައިވާ ކަމަށް އިބްރާހިމް އަބްދުއްރައްޒާގު ވިދާޅުވިއެވެ. މި ފުރުސަތަކީ އަންނަން އޮތް ޖީލުތަކަށްވެސް ފައިދާ ކުރާނެ ކަމެއް ކަމަށް އޭނާ ފާހަގަކުރެއްވިއެވެ.
މި އިންތިޒާމުގެ މައިގަނޑު މަގުސަދަކީ ބޮޑެތި ބަލިތައް ދުރާލާ ދެނެގަނެ ފަރުވާ ލިބޭނެ މަގު ތަނަވަސްކޮށްދިނުމެވެ. އަދި 40 އަހަރުން މަތީގެ ކޮންމެ މީހަކަށްވެސް ކެންސަރު ސްކްރީންކުރެވޭނެ އިންތިޒާމުވެސް ވަނީ ހަމަޖައްސާފައެވެ. މި ފުރުސަތުގެ ބޭނުން ހިފުމަށް ކަމާބެހޭ އިދާރާތަކުން ވަނީ އާންމުންނަށް އިލްތިމާސްކޮށްފައެވެ.
