ދައުލަތުގެ ބަޖެޓުގެ ޖުމްލަ އާމްދަނީގެ މަދުވެގެން %5 ކައުންސިލްތަކަށް ދޭންވާނެކަމަށް ކަނޑައަޅާފައި ވަނިކޮށް، ކަނޑައެޅިގެން ލާމަރުކާޒީ ގާނޫނާ ހިލާފަށް ކައުންސިލްތަކަށް ހައްގުވާ ބްލޮކް ގްރާންޓުން ވަރަށް ބޮޑު މިންވަރެއް އުނިކޮށް، މާލީ ވަޒީރު ގާނޫނާ ހިލާފުވެފައި ވުމަކީ ދަ ޑިމޮކްރެޓްސް އިން ނުހަނު ކަންބޮޑުވެ ކުށްވެރިކުރާ ކަމެއްކަމަށް އެ ޕާޓީން ނެރުނު އިއުލާނުގައި ހާމަކޮށްފައިވެއެވެ.
އެކަމާ ގުޅިގެން "ސީއެންއެމް" އަށް މައުލޫމާތު ދެއްވަމުން ހަސަން ލަތީފް ވިދާޅުވީ ގާނޫނުގައި އޮތީ ކައުންސިލްތަކަށް އާމްދަނީގެ ގޮތުގައި ދޭ 5 ޕަސަންޓް ކަމަށްވީނަމަވެސް ލާމަރުކަޒީ އުސޫލުން އިދާރީ ދާއިރާތަށް ހިންގުމުގެ އެ ކޮންސެޕްޓް މިހާރަށްވުރެ ވެސް ފުޅާކުރަން ބޭނުންކުރަން ވަންޏާ އެ އަދަދު މިހާރަށްވުރެ އިތުރު ކުރަން ޖެހޭކަމަށް ދެކިވަޑައިގަންނަވާކަމަށް ކައުންސިލް ރައީސް ވިދާޅުވިއެވެ.
އޭރު ރައްޔިތުން ދުށްގޮތާ މިހާރު ދެކޭގޮތާ ވަރަށް ތަފާތު ކަމަށް ވީއިރު އޭގެ މާނައަކީ ވަރަށް ބައިވަރު މަސައްކަތް އެކި ސަރަހައްދުތަކުގައި ބާރުވެރިކަމާއެކީގައި ކައުންސިލްތަކަށް ކުރުމުގެ ފުރުސަތު ފުޅާކޮށްދޭން ޖެހޭ ކަން ކަމަށް ޑިމޮކްރެޓްސްގެ ރައީސް ވިދާޅުވިއެވެ.
ރާއްޖެއަކީ މިހާރު އާބާދީގެ ނިސްބަތުން ބަލާއިރު، އާބާދީއަށް ބާލާއިރު 5 ލައްކަ އެތައް ބަޔަކު އުޅޭ ތަނެއްކަަމަށް ވިޔަސް ވެސް ރާއްޖޭގައި ދިރިއުޅޭ އަދަދަކީ އެއަށްވުރެ މާބޮޑު އަދަދެއް ކަަމަށް އޭނާ ވިދާޅުވިއެވެ. އަދި ރިސޯޓްތަކުގައި ތިބި މީހުންނާ ހުރިހާ އެންމެން ލާގެން ގާތްގަނޑަކަށް މިލިއަންއަކަށް ގާތްކުރާކަމަށާއި އެހެންވީމާ ހިދުމަތާ އެހުރިހާ ކަމަކަށް ބަލާއިރު ވަރަށް ބައިވަރު މަސައްކަތްކުރަން ޖެހޭ ކަަމަށްވެސް ހަސަން ލަތީފް ވިދާޅުވިއެވެ.
ޑިމޮކްރެޓްސް އިން ނެރުނު އިއުލާނުގައި މައިގަނޑުގޮތެއްގައި ވަނީ ސަރުކާރުން ބަޖެޓް ކަނޑައެޅުމުގައި ގާނޫނާ ހިލާފުވެ، ލާމަރުކަޒީ ނިޒާމުގެ ބާރުކަނޑުވާލުން އެ ޕާޓީން އިން ކުށްވެރިކުރާ ކަމުގެ ވާހަކައެވެ.
