މި ހާދިސާގައި އެ ކުއްޖާ ދުއްވި ސައިކަލުން ފުލުހެއްގެ ގައިގައި ޖައްސާލާފައިވާ ކަމަށް ފުލުހުން ބުނެ އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ މި މައްސަލައިގައި ހައްޔަރުކޮށްފައިވަނީ އަހުމަދު ޝާހީން ޝަހީދު ކަމަށެވެ. އޭނާ ދުއްވަމުން ދިޔަ ސައިކަލު މަޑުކުރުމަށް ފުލުހުން އެންގުމުން، މަޑުނުކޮށް ދުއްވާފައި ދިޔުމުގެ ތެރޭގައި ފުލުހެއްގެ ގައިގައި ޖައްސާލާފައިވާ ކަމަށް ފުލުހުން މައުލޫމާތު ދިނެވެ.
މި ހާދިސާ ހިނގާފައިވަނީ ހުޅުމާލެ ރީތިގަސް މަގުގައި ކަމަށް ފުލުހުން ބުންޏެވެ. އަދި ޝާހީން ބާރު ސްޕީޑުގައި ސައިކަލު ދުއްވަމުން ދިޔަ ކަމަށާއި، އޭނާ އަތުގައި ސައިކަލު ދުއްވުމުގެ ލައިސަންސް ނެތް ކަމަށް ވެސް ފުލުހުން ބުނެފައިވެ އެވެ.
ފުލުހުން އިތުރަށް ބުނީ މި ހާދިސާގައި އަނިޔާވި ފުލުސް މީހާއަށް ހޮސްޕިޓަލުގައި ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށެވެ. އަދި ޝާހީން ވަނީ ފުލުހުންގެ ވާޖިބު އަދާކުރުމަށް ހުރަސް އަޅާފައި ކަމަށް ވެސް ފުލުހުން ބުންޏެވެ.
