މިއަދު ބޭއްވި ނޫސްވެރިންގެ ބައްދަލުވުމެއްގައި އޭޑީކޭގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު ބުނީ ޕްރައިވެޓް އިންޝުއަރެންސް ދޭ ގިނަ ކުންފުނިތަކުން ކޭޝްލެސް ސާވިސް ހުއްޓާލަން ނިންމާފައިވާ ކަމަށެވެ. މީގެ މާނައަކީ ހިދުމަތް ހޯދަން އަންނަ މީހުން އަމިއްލަ އަތުން ފައިސާ ދައްކަން ޖެހުމެވެ.
ނިޔާފު ބުނި ގޮތުގައި ޕްރައިވެޓް އިންޝުއަރެންސްގެ ލިމިޓް ހަމަނުވާ ނަމަ، ހިދުމަތް ހޯދަންދާ މީހާގެ އަތުން އެ ހިދުމަތަށްވާ ފުރިހަމަ އަގު ނަގާނެ އެވެ. އަދި އެ ފައިސާ ހޮސްޕިޓަލަށް ދެއްކުމުން، ބިލެއް ދޭނެ ކަމަށާއި އެ ބިލު ޖެހެނީ ޕްރައިވެޓް އިންޝުއަރެންސް ހިދުމަތްދޭ ތަނަށް ހުށަހަޅައިގެން، ޑޮކްޓަރަށް ދެއްކުމަށް ހޭދަކުރި ފައިސާ އަނބުރާ ހޯދަން ކަމަށް އޭނާ ބުންޏެވެ.
އާސަންދައިން ސިއްހީ ހިދުމަތްދޭ ތަންތަނަށް ފޮނުވި ސާކިއުލާގައި ބުނެފައިވަނީ ސިއްހީ ހިދުމަތް ހޯދުމަށް އަންނަ ފަރާތަކީ އަމިއްލަ އިންޝުއަރެންސެއް އޮތް ފަރާތެއް ނަމަ، މި ހިދުމަތުގެ މެމޯ ތައްޔާރުކުރުމުގެ ކުރިން، އެކަން ކަށަވަރުކޮށް، އެ އިންޝުއަރެންސެއްގެ ކަވަރޭޖް ލިމިޓް ހަމަވަންދެން އެ އިންޝުއަރެންސް މެދުވެރިކޮށް ހިދުމަތް ފޯރުކޮށްދޭން ޖެހޭނެ ކަމަށެވެ.
