މި މައުރަޒު ހުޅުވާދެއްވި ރައީސް ޑރ. މުހައްމަދު މުއިއްޒުއެވެ. މި މައުރަޒު ކުރިޔަށްދަނީ ނޭޝަނަލް އާޓް ގެލެރީގައެވެ.
މި މައުރަޒުން ފެނިގެންދާނީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި އެދުވަހު ނަސްރު ހޯދުމަށް ސިފައިން ދެއްކި ހިތްވަރުކަމަށް އެމްއެންޑީއެފުން ބުނެއެވެ. އަދި މި މައުރަޒުގެ މައިގަނޑު އެއް ބޭނުމަކީ ނަސްރުގެ ދުވަހުގެ މައުލޫމާތު އަދުގެ ޖީލަށް ބުނެދިނުންކަމަށްވެސް އެމްއެންޑީއެފުން ބުނެއެވެ.
1988 ވަނަ އަހަރުގެ ނޮވެމްބަރު 3 ގައި ދިވެހި ސިފައިން ބޭނުންކުރު ހަތިޔާރުތައް ދައްކާލަނީ
މައުރަޒު ކުރިއަށްދާނީ މިއަދުން ފެށިގެން މިމަހުގެ 9 އަކަށް ނެޝަނަލް އާޓް ގެލެރީގައެވެ. އަދި މި މައުރަޒު އާންމުންނަށް ބަލައިލުމަށް ހުޅުވާފައި ހުންނާނީ ހެނދުނު 0900 އިން 1200 އަށް، މެންދުރުފަހު 1400 އިން 1800 އަދި ރޭގަނޑު 2000 އިން 2200 އަށެވެ.
މިއަހަރުގެ ނަސްރުގެ ދުވަސް ފެށިގެން ދިޔައީ ބޮޑު ޖަމާއާތުގައި ކުރި ފަތިސް ނަމާދުން
ރާއްޖޭގެ ވެރިކަން ފުރޮޅާލަން ދިވެހިގެ ހާއިނުންގެ މަދު ބަޔަކު އަޑީގައި ތިބެގެން ރާއްޖެއަށް ހަމަލާ ދިނީ 3 ނޮވެމްބަރު 1988 ގައެވެ. ފަތިސްގަޑީގައި މާލެއަށް ވެރިފައިވާ ހިމޭންކަން ނަގައިލީ ހެންވޭރު ހާޖަރާގޭ އަބްދުالله ލުތުފީ ސަގަރު ނާސިރު އިސްވެ ތިބެ ސްރީލަންކާގެ ޓެރަރިސްޓް ޖަމާއަތެއް ކަމަށްވާ ޕީޕަލްސް ލިބަރޭޝަން އޯގަނައިޒޭޝަން އޮފް ޓެމިލް އީލާމް (ޕްލޮޓް) ކުލީ ސިފައިންތަކެއް ގޮވައިގެން އައިސް ދިން ހަމަލާތަކުންނެވެ.
އެމީހުން ވަނީ މައުސޫމް 19 ދިވެއްސެއްގެ ލޭ މި ފަސްގަނޑަށް އޮހުރުވާލައިފައެވެ. އޭގެތެރޭގައި ހިމެނެނީ ހިތްވަރުގަދަ ސިފައިންގެ 8 ބޭކަލުންނާއި، އާންމުގެ 11 މީހުންނެވެ.
3 ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު
މިއަހަރުގެ ނަސްރުގެ ދުވަސް ފެށިގެން ދިޔައީ ބޮޑު ޖަމާއާތުގައި ކުރި ފަތިސް ނަމާދުންނެވެ. ރައީސުލްޖުމްހޫރިއްޔާގެ ދެކަނބަލުން ވަނީ 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު ޝަރަފުވެރިކޮށްދެއްވާފައެވެ.
ނަސްރުގެ ދުވަހުގެ ރަސްމީ ޖަލްސާ އޮންނާނީ މިރޭ ދަރުބާރުގޭގަ އެވެ.
