މި މައުރަޒު ހުޅުވައިދެއްވީ ނޭޝަނަލް އާޓް ގެލެރީގައި ބޭއްވުނު ރަސްމިއްޔާތެއްގައެވެ.
މި މައުރަޒަކީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ރާއްޖެއަށް ދިމާވި އުދުވާނީ ހަމަލާއާ ގުޅޭ ތަކެތި ދައްކުވައިދޭ މައުރަޒެކެވެ. މި މައުރަޒުގައި އެ ދުވަހު ރާއްޖެއަށް ލިބުނު ގެއްލުންތަކާއި، ނަސްރު ހޯދުމަށް ސިފައިން ދެއްކި ހިތްވަރު ފެންނަން ހުންނާނެ ކަމަށް ބުނެއެވެ.
މައުރަޒު ހުޅުވުމަށްފަހު ރައީސް މުއިއްޒު އާއި އަނބިކަނބަލުން ވަނީ މައުރަޒު ބައްލަވާލައްވާފައެވެ. އަދި މައުރަޒުގައި ހުރި ތަކެއްޗާއި އެ ދުވަހުގެ ވާހަކަތައް ސިފައިންގެ އިސް ވެރިން ރައީސަށް ކިޔައިދެއްވިއެވެ.
މި މައުރަޒަކީ ޔޫތު މިނިސްޓްރީ އާއި ދިފާއީ ބާރު ގުޅިގެން ބާއްވާ ފުރަތަމަ މައުރަޒެވެ. މި މައުރަޒުގައި 200 އަށްވުރެ ގިނަ ޑިސްޕްލޭ ހުންނާނެ އެވެ. އަދި އެހެން އަހަރުތަކާ ހިލާފަށް މި އަހަރުގެ މައުރަޒުގައި ފޮޓޯގެ އިތުރުން ނަސްރުގެ ދުވަހު ބޭނުންކުރި ބައެއް އަސްލު ހަތިޔާރާއި އެހެނިހެން ތަކެތި ވެސް އާންމުންނަށް ދައްކާލުމަށް ބަހައްޓާފައިވެއެވެ.
މި މައުރަޒު ކުރިއަށްދާނީ މި މަހުގެ 9 ވަނަ ދުވަހުގެ ނިޔަލަށް ނޭޝަނަލް އާޓް ގެލެރީގައެވެ. މައުރަޒު ހުޅުވިފައި ހުންނާނީ ކޮންމެ ދުވަހަކު ހެނދުނު 9 އިން މެންދުރު 12 އަށް، މެންދުރުފަހު 2 އިން ހަވީރު 6 އަށް، އަދި ރޭގަނޑު 8 އިން 10 އަށެވެ.
