1980 ވަނަ އަހަރު ލާންސްކޯޕްރަލެއްގެ ގޮތުގައި ސިފައިންގެ ވަޒީފާ އާ ގުޅިވަޑައިގެންނެވި މޫސާ އަލީ ޖަލީލަށް ނިޝާން އަސްކަރީ ވެރިކަމުގެ އިއްޒަތް އެރުއްވީ ރައީސް ޑރ. މުހައްމަދު މުއިއްޒު އެވެ. މޫސާ އަލީ ޖަލީލަށް އެ އިއްޒަތް އެރުވުމަށް ރައީސް ނިންމެވީ ދިވެހި ގައުމާއި ރައްޔިތުންގެ ސަލާމަތަށްޓަކައި އަސްކަރީ ގޮތުން ކުރެއްވި އަގުހުރި ހިދުމަތްތަކާއި ގައުމުގެ އިސްތިގުލާލާއި ސިޔާދަތު ރައްކާތެރިކޮށް ދެމެހެއްޓެވުމަށްޓަކައި ކޮށްދެއްވި މަސައްކަތް ފާހަގަ ކުރައްވަ އެވެ.
މޫސާ އަލީ ޖަލީލަކީ 1988 ވަނަ އަހަރުގެ ނޮވެމްބަރު 3 ގައި ރާއްޖެއަށް ދިން އުދުވާނީ ހަމަލާއިން ރާއްޖެ ސަލަމާތް ކުރުމުގައި ވަރަށް އިސް ދައުރެއް އަދާ ކުރެއްވި ބޭފުޅެކެވެ. އެގޮތުން ސިފައިންގެ މައި މަރުކަޒަށް ކެނޑިނޭޅި ހަމަލާތައް އަމާޒުވަމުންދިޔަ ވަގުތު، ދުޝްމަނުންގެ ހަރަކާތްތައް ހުރިނެތް ގޮތް ބެލުމަށް ސިފައިންގެ ތެރެއިން ނުކުމެވަޑައިގެންނެވި ސިފައިންގެ ބޭކަލުންގެ ތެރެއިން އިސްވެރިއެއްގެ ގޮތުގައި ހުންނެވި ބޭފުޅާ އެވެ.
މޫސާ އަލީ ޖަލީލް: އޭނާ ވަނީ އަސްކަރީ އެންމެ އިސް ކޮމާންޑަރެއްގެ މަގާމާއި އެމްއެންޑީއެފްގެ ޗީފް އޮފް ޑިފެންސް ފޯސްގެ މަގާމު ފުރުއްވައިފައި -- ފޮޓޯ: ރައީސް އޮފީސް
މޫސާ އަލީ ޖަލީލް ވަނީ ރިޓަޔާ ކުރެއްވުމުގެ ކުރިން ކޯސްޓު ގާޑުގެ ޑައިރެކްޓަރުގެ މަގާމާއި ވައިސް ޗީފް އޮފް ޑިފެންސް ފޯސްގެ އިތުރުން ޗީފް އޮފް ޑިފެންސް ފޯސްގެ މަގާމު ވެސް އަދާ ކުރައްވައިފަ އެވެ.
ނިޝާން އަސްކަރީގެ ވެރިކަމުގެ ޢިއްޒަތް، މޭޖަރ ޖެނެރަލް (ރިޓަޔަރޑް) މޫސާ އަލީ ޖަލީލަށް އެރުވުމަށް، ރައީސް ނިންމަވާފައިވާއިރު، މީގެ ކުރިން އެމަނިކުފާނަށްވަނަށް ޖިހާދުގެ ރަތް މެޑަލާއި ދިގުމުއްދަތެއްގައި ހިދުމަތް ކުރުމުގެ މެޑަލްވެސް ވަނީ ދެއްވާފަ އެވެ. މޫސާ އަލީ ޖަލީލް ރިޓަޔާ ކުރެއްވިއިރު، އޭނާއަށް ވަނީ ނުވަ ކުލަ އާއި 11 މެޑަލް ލިބިވަޑައިގެންފަ އެވެ.
މޫސާ އަލީ ޖަލީލް ސިފައިންގެ ހިދުމަތުން ރިޓަޔާ ކުރެއްވީ 8 ފެބްރުއަރީ 2012ގަ އެވެ.
