ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން މައުމޫން ވިދާޅުވީ ދުނިޔޭގެ ސިޔާސީ އޮއިވަރުތައް ހިނގަމުންދާ ގޮތުން ރާއްޖެ އަށް ކުއްލި ނުރައްކަލެއް ދިމާވުމަކީ އަބަދުވެސް ވެދާނެ ކަމެއް ކަމަށާއި އެކަމަށް ރައްޔިތުން އަބަދުވެސް ތިބެންވާނީ ހޭލާ ކަމަށެވެ.
ނޮވެމްބަރު 3ގެ ބިރުވެރި ހާދިސާ ކުރިމަތިވި އިރު ރާއްޖޭގެ ވެރިކަމުގައި ހުންނެވި މައުމޫން ވިދާޅުވީ އަމިއްލަ ސަލާމަތާއި ރައްކާތެރިކަމަށް އަޅުގަނޑުމެންގެ އީމަންތެރިކަން ވަރުގަދަ ކުރަން ޖެހޭ ކަމަށެވެ.
މައުމޫން ވިދާޅުވީ، ރާއްޖެ އަށް ނަސްރު ލިބުނީ މާތް ﷲ ގެ ހަޟްރަތުން ކަމަށާއި އެއީ ގަބޫލުކުރަން ޖެހޭ ހަގީގަތެއް ކަމަށެވެ. އެހެންވެ، އަމިއްލަ ސަލާމަތަށްޓަކައި ވެސް އަޅުގަނޑުމެންގެ އީމާންތެރިކަން ވަރުގަދަ ކުރަންޖެހޭ ކަމަށް އެ މަނިކުފާނު ވިދާޅުވި އެވެ.
އެ މަނިކުފާނު ވިދާޅުވީ، ސިޔާސީ ކަންކަމަށް ވުރެ ބޮޑަށް ގައުމީ އުސޫލުތަކަށް އަބަދުވެސް އިސްކަންދޭން ޖެހޭނެ ކަމަށެވެ. ނޮވެމްބަރު 3 ގެ އުދުވާނީ ހަމަލާގެ ދުވަސްވަރު ވެސް ފެނުނީ ދިވެހިންގެ ވަރުގަދަ އެއްބައިވަންތަކަން ކަމަށާއި ސަރުކާރާ މެދު ހިތްހަމަ ނުޖެހުނު މަދު މީހުން ވެސް އެ ދުވަހު ތިބީ ސަރުކާރާ އެކު ކަމަށް މައުމޫން ވިދާޅުވި އެވެ.
މައުމޫނު ވަނީ އެ ދުވަހާއި އޭގެ ފަހުން ވެސް ރާއްޖެއަށް އެހީތެރިވެދިން އެކުވެރި ގައުމުތަކަށާއި ބައިނަލްއަގުވާމީ ޖަމާއަތްތަކަށް ޝުކުރު އަދާކުރައްވައިފަ އެވެ.
މައުމޫނު ވިދާޅުވީ ދުނިޔޭގެ ސިޔާސީ އޮއިވަރު ހިނގަމުންދާ ގޮތުން ރާއްޖެއަށް ކުއްލި ނުރައްކަލެއް ދިމާވުމަކީ ވެދާނެ ކަމެއްކަން އަބަދުވެސް ހަނދާން ބަހައްޓަން ޖެހޭ ކަމަށެވެ.
އެމަނިކުފާނު ވަނީ މިނިވަންކަމާ ސިޔާދަތު ދެމެހެއްޓުމަށްޓަކައި ރައީސް ޑރ. މުހައްމަދު މުއިއްޒު ގެންގުޅުއްވާ ހަރުދަނާ ސިޔާސަތަށް ޝުކުރުދަންނަވައި ތައުރީފުކުރައްވާފަ އެވެ.
އަދި އެމަނިކުފާނުގެ ވާހަކަފުޅު ނިންމަވާލައްވަމުން ވިދާޅުވީ ފަލަސްތީނުގެ ރައްޔިތުން، ވަކިން ހާއްސަކޮށް ގާޒާގެ ރައްޔިތުންނަށް ކުރިމަތިކުރަމުންދާ ހާލަތު ކުށްވެރި ކުރަންޖެހޭ ކަމަށެވެ. އަދި އެމީހުންގެ ވަރުގަދަ ޖިހާދަށް ތާއީދުކުރުންމަތީ ދިވެހިން ދެމިތިބެންޖެހޭނެ ކަމަށް ވިދާޅުވި އެވެ.
ނަސްރުގެ ދުވަސް ފާހަގަކުރަނީ ނަވާރަސަތޭކަ އަށްޑިހަ އަށްވަނަ އަހަރުގެ ނޮވެމްބަރު މަހުގެ ތިންވަނަ ދުވަހު ގައި އަވަށްޓެރި ސްރީލަންކާގެ ތަމަޅަ ހަނގުރާމަވެރިންގެ ބަޔަކު ގޮވައިގެން ދިވެހީންގެ ބަޔަކު ރާއްޖޭގެ ވެރިރަށް މާލެއަށް ހަމަލާދިން ދުވަހާ ގުޅުވައިގެންނެވެ. އެ ހާދިސާއަށް މިއަދު 36 އަހަރު ވަނީ ފުރިފަ އެވެ. އެ ދުވަހު، ދިން ނުރައްކާތެރި އުދުވާނީ ހަމަލާގައި ސިފައިންގެ 8 ބޭކަލަކާއި އާންމުންގެ 11 މީހުން ހިމެނޭހެން 19 ދިވެއްސަކު ޝަހީދުވި އެވެ.
