މިއަދު މަޖިލީހުގެ ޖަލްސާ ނިންމަވާލައްވަމުން އަބްދުއްރަހީމް ވިދާޅުވީ، މަޖިލީހުގެ މަސައްކަތްތައް ހަލުވިކޮށް ކުރިއަށް ގެންދަނީ ރައްޔިތުން ބޭނުންވާ ސްޕީޑުގައި ކަމަށެވެ. އަދި ރައްޔިތުން ބޭނުންވާ ގޮތަށް މަޖިލީހުގެ މަސައްކަތްތައް ކުރިއަށް ގެންދިއުމަށް ޕީއެންސީއަށް ބޮޑު އަގުލަބިއްޔަތެއް ދީފައިވާ ކަމަށް ވެސް އެ މަނިކުފާނު ވިދާޅުވިއެވެ.
އެމްޑީޕީގެ ޕީޖީ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެފައިވަނީ މަޖިލީހުން ކަންކަން ނިންމަނީ ރައީސް މުއިއްޒުގެ އެންގެވުމާ އެއްގޮތަށް ކަމަށެވެ. އަދި ބިލުތައް އަވަސް އަވަހަށް ފާސްކުރަމުންދާތީ އެމްޑީޕީން ވަނީ ކަންބޮޑުވުން ފާޅުކޮށްފައެވެ.
އެހެން ނަމަވެސް މަޖިލީހުގެ ރައީސް ވިދާޅުވީ، ރައީސް މުއިއްޒު ވެވަޑައިގެންނެވި ވައުދުތައް ފުއްދުމަށް މަޖިލީހުން ދޭންޖެހޭ އެއްބާރުލުން ދިނުމަށް މަގުފަހިކޮށްދިނުމުގެ ގޮތުން ރައްޔިތުން ވަނީ ޕީއެންސީއަށް ބޮޑު އަގުލަބިއްޔަތެއް ދީފައި ކަމަށެވެ. އަދި އެ މަގުސަދު މަޖިލީހުން ހާސިލުކޮށްދޭނެ ކަމުގެ ޔަގީންކަން ރައްޔިތުންނަށް އަރުވާ ކަމަށް ވެސް އެ މަނިކުފާނު ވިދާޅުވިއެވެ.
