ޕީސީބީން ބުނީ ބަޖެޓް ފޮނުވަންޖެހޭ އުސޫލެއް ހެދީ ސަރުކާރު ކުންފުނިތަކާއި ސަރުކާރު ބައިވެރިވާ ކުންފުނިތައް އަދި ވިޔަފާރީގެ އުސޫލުން ހިންގާ ތަންތަނުގެ ބަޖެޓު އެއްހަމައަކުން ދިރާސާކޮށް، ލުއިފަސޭހަ ކުރުމަށްޓަކައި އާންމު އުސޫލަކުން އަމަލު ކުރުމުގެ ބޭނުމުގައިކަމަށެވެ.
މި އުސޫލުގައިވާ ގޮތުން ފިނޭންސް މިނިސްޓްރީން އަންގާ ގޮތެއްގެ މަތިން ބަޖެޓު ރިވިއު ރިޕޯޓު އެ މިނިސްޓްރީއަށް ކުންފުނިތަކުން ފޮނުވަން ޖެހެއެވެ. އަދި ކޮންމެ އަހަރެއްގެ ޖެނުއަރީ އަދި ޖުލައި މަހު ޕީސީބީއަށް ބަޖެޓު ރިވިއު ރިޕޯޓު ހުށަހަޅަން ޖެހެއެވެ.
މީގެއިތުރުން ބަޖެޓުގައި ހިމަނަން ޖެހޭނެ މައުލޫމާތާއި ހުށަހަޅަން ޖެހޭ ޓެމްޕްލޭޓް ވެސް އުސޫލުގައި ވަނީ ހިމަނާފައެވެ. އަދި ކޮންމެހެން މަޖުބޫރީ ހާލަތެއްގައި މެނުވީ ކުންފުނިން ފާސްކޮށްފައިވާ ބަޖެޓަށް ބަދަލު ގެނެސްގެން ނުވާނެކަމަށް އުސޫލުގައި ވަނީ ކަނޑައަޅާފައެވެ.
މި އުސޫލު އާއްމުކޮށްް ޕީސީބީން ކުންފުނިތަކަށް ފޮނުވި ސާކިއުލާގައި ބުނީ އެ އުސޫލުގައި ކުންފުނިތަކުން އެ ތަންތަނުގެ ބަޖެޓު އެކުލަވާލުމުގައި ހަދަން ޖެހޭ އާންމު ދިރާސާތަކާއި ޕްރޮސެސް ކަނޑައަޅާފައިވާނެ ކަމަށެވެ. އަދި ބަޖެޓު ރިވިއުކުރުމަށް ޕީސީބީ އާއި ފިނޭންސް މިނިސްޓްރީއަށް ހުށަހަޅަން ޖެހޭ ލިޔުންތައް ހުށަހެޅުމުގައި އަމަލު ކުރާނެ ގޮތްތައް އުސޫލުގައި ވާނެކަމަށް ޕީސީބީން ބުނެއެވެ
2025 ވަނަ އަހަރުގެ ބަޖެޓު އެކުލަވައިލުމުގެ މަރުހަލާ ކުންފުނިތަކުން މިހާރު ފަށާފައިވާތީ، އުސޫލާ އެއްގޮތްވާ ގޮތުގެ މަތިން ބަޖެޓާ ގުޅޭ ލިޔުންތައް އެކުލަވާލަން ފަށާނީ 2026 ވަނަ" އަހަރުން ފެށިގެން ކަމަށް ޕީސީބީން ވަނީ ބުނެފައެވެ.
