ޕީއެންއެފްއިން ރޭ ބޭއްވި ޖަލްސާގައި ވާހަކަފުޅު ދައްކަވަމުން ޔާމީން ވިދާޅުވީ، ސަރުކާރުން އަންނަ އަހަރުން ފެށިގެން ކޮންމެ އަހަރަކު 1،000 ސިފައިންނާއި 1،000 ފުލުހުން ތަމްރީނު ކުރުމަށް ނިންމާފައިވާއިރު، އެކަމަށް ހިނގާނެ ހަރަދުތައް ބަޖެޓުގައި ހިމަނާފައި ނުވާ ކަމަށެވެ.
ޔާމީން ވިދާޅުވީ ސިފައިންގެ ބަޖެޓަށް އެކަނި ދެ ބިލިއަން ރުފިޔާ ޖެހޭނެ ކަމަށާއި ފުލުހުންގެ ބަޖެޓު ވެސް އެ އަދަދަށް އަރާނެ ކަމަށެވެ. އަދި މިހާރު ވެސް ސިފައިންނާއި ފުލުހުންނަށް އެކަށީގެންވާ ވަރަށް ބޯހިޔާވަހިކަން ފޯރުކޮށް ނުދެވޭއިރު، އަލަށް ނަގާ މުވައްޒަފުންނަށް ބޯހިޔާވަހިކަމާއި މުސާރަ ހަމަޖައްސާނީ ކިހިނެއްތޯ ސުވާލު އުފެއްދެވި އެވެ.
ސަރުކާރުން އަންނަ އަހަރަށް ހުށަހަޅާފައިވާ 56.6 ބިލިއަން ރުފިޔާގެ ބަޖެޓުގައި ގައުމީ ދިފާއީ ބާރަށް 2.14 ބިލިއަން ރުފިޔާ އަދި ފުލުހުންނަށް 2.7 ބިލިއަން ރުފިޔާ ހިމަނާފައިވެ އެވެ. އަދި ގައުމީ ހިދުމަތުގެ ޕްރޮގްރާމަށް އަހަރަކު 400 މިލިއަން ރުފިޔާ ހާއްސަ ކުރާނެ ކަމަށް ރައީސް މުއިއްޒު ވަނީ ވިދާޅުވެފައެވެ.
