މެންޗެސްޓަރ ޔުނައިޓެޑުގެ އާ ކޯޗު، ރުބެން އަމޯރިމް އޭނާގެ މިހާރުގެ ކްލަބާ ޕޯޗުގަލްގެ ސްޕޯޓިން އިން، ޗެމްޕިއަންސް ލީގުގައި މެންޗެސްޓާ ސިޓީ ރޭ ބަލިކުރީ ހަތަރު ލަނޑު އެއް ލަނޑުންނެވެ. ޕޯޗުގަލްގެ ލިސްބަން ގައި ކުޅުނު މި މެޗުން ސިޓީ މި ބަލިވި ބަލިވުމަކީ މިއީ 2020 ވަނަ އަހަރުގެ ސެޕްޓެމްބަރ މަހަށްފަހު ސިޓީ ބަލިވެފައިވާ އެންމެ ތަފާތުބޮޑު ނަތީޖާ އެވެ. އަދި މިއީ، ޕެޕް ގަޑިއޯލާގެ އިރުޝާދުގެ ދަށުން ކުޅެމުންދާ މެންޗެސްޓަރ ސިޓީ ޖެހިޖެހިގެން ތިން މެޗުން ބަލިވި ފުރަތަމަ ފަހަރެވެ.
ޔުނައިޓެޑުގެ އާ ކޯޗުގެ އިރުޝާދާ އެކު އޭނާގެ މިހާރުގެ ކްލަބު، ސްޕޯޓިން އިން ކުޅޭ އެންމެ ފަހު ދެ މެޗުގެ ތެރެއިން ފުރަތަމަ މެޗުން ސްޕޯޓިންގ މޮޅުވުމާއެކު އެ ޓީމަށް ވަނީ ޗެމްޕިއަންސް ލީގުގައި މިހާތަނަށް ކުޅުނު ހަތަރު މެޗުން 10 ޕޮއިންޓާއެކު ތާވަލުގެ ދެވަނަ މަގާމް ލިބިފަ އެވެ. މިއީ ޗެމްޕިއަންސް ލީގުގައި ސްޕޯޓިންގގެ ކޯޗެއްގެ ގޮތުގައި އޭނާ މަސައްކަތް ކުރާނެ ފަހު މެޗެވެ. ލީގުގައި އަންނަ ހަފްތާގައި ކުޅޭ މެޗަށްފަހު އޭނާ އެ ޓީމު ދޫކޮށް ޕްރިމިއާ ލީގުގެ މެންޗެސްޓަރ ޔުނައިޓެޑާއި ހަވާލުވާންކަން މިހާރު ވަނީ އިއުލާން ކޮށްފަ އެވެ.
އަމޯރިމް، ސިޓީއާ ދެކޮޅަށް ސްޕޯޓިން ގޮވައިގެން ނުކުތުމުގެ ކުރިން އޭނާ ބުނީ ސްޕޯޓިން އިން ސިޓީ ބަލިކޮށްފިނަމަ، އޭނާއަކީ އާ ފާގަސަންގެ ގޮތުގައި ޔުނައިޓެޑުގެ ސަޕޯޓަރުން ދެކޭނެ ކަމަށެވެ. ފާގަސަންއަކީ ޔުނައިޓެޑުގެ ތާރީހުގައިވެސް އެންމެ ކާމިޔާބު ކޯޗެވެ. އެހެންކަމުން މި މެޗުން އޭނާ މޮޅުވުމާއެކު ޔުނައިޓެޑުގެ ސަޕޯޓަރުންގެ އުއްމީދުތައްވަނީ ބޮޑު ވެފައެވެ.
