ހައުސިން މިނިސްޓަރު އަލީ ހައިދަރު އަހުމަދު ވިދާޅުވީ ތަރައްގީގެ ޕްލޭން ތަންފީޒުކުރުމަށް ބޭނުންވާ އިތުރު ބާރުވެރިކަން ގެނައުމަށް ގާނޫނު އަސާސީއަށް މާއްދާއެއް އިތުރުކުރުމަށް ނިންމާފައިވާ ކަމަށެވެ. އަދި ގައުމީ ތަރައްގީގެ ގާނޫނުގެ ބިލެއް އެކުލަވާލައި ރައްޔިތުންގެ މަޖިލީހަށް ހުށަހަޅާނެ ކަމަށްވެސް އެ މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މި ޕްލޭން އެކުލަވާލުމުގައި ރާއްޖޭގެ އެކި ކަންކޮޅުތަކުގެ އާންމު ދިރިއުޅުމުގެ ހާލަތު ދެނެގަނެ، ދާއިރާތަކަށް ކުރިމަތިވެފައިވާ ގޮންޖެހުންތައް ވަޒަންކޮށްފައިވާ ކަމަށެވެ. އަދި ހެއްކާއި މައުލޫމާތުގެ އަލީގައި ކަންކަން އިސްލާހުކޮށް ކުރަންޖެހޭ މަސައްކަތްތައް، އިލްމީ ނަޒަރަކުން ދެނެގަނެވޭނެ ކަމަށް އެ މިނިސްޓަރު ވިދާޅުވި އެވެ.
މި ޕްލޭނަކީ ދިވެހިރާއްޖޭގެ ތަރައްގީ ބައްޓަންކުރުމަށް ގައުމު ދަތުރުކުރާނެ މަގުޗާޓެއް ކަމަށާއި، އެކި އުމުރުފުރާތަކާއި އެކި ފަންތީގެ، އެކިއެކި ދާއިރާތަކުގެ އެންމެން ހިމެނޭހެން ހުރިހާ ރައްޔިތުންނަށް ހަމަހަމަ ފުރުސަތުތަކެއް ހޯދައިދިނުމަށް މަގުފަހިކޮށްދޭނެ ކަމަށް މިނިސްޓަރު ވިދާޅުވި އެވެ.
