ކޮމިޓީގެ މުގައްރިރު، މާފަންނު މެދު ދާއިރާގެ މެންބަރު އަސްމާ ރަޝީދު އިސްކޮށް އިންނެވި ބައްދަލުވުމުގައި، ބިލު އިތުރަށް ދިރާސާ ކުރަން ޖެހޭ ކަމަށް މެންބަރުން ވަނީ ފާހަގަކޮށްފަ އެވެ. މީގެ އިތުރުން ހެލްތު މިނިސްޓްރީ އާއި އެޗްޕީއޭ އަދި ފުލުހުންގެ ފަރާތުން ފާހަގަކޮށްފައިވާ ކަންބޮޑުވުންތައް ހިމެނެ އެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ވިދާޅުވީ ބިލުގައި ހުރި ބައެއް ކަންކަން ތަންފީޒު ކުރުމުގައި ދަތިތަކެއް ހުރި ކަމަށް ފުލުހުން ފާހަގަކޮށްފައިވާ ކަމަށެވެ. އަދި ބިލާ ގުޅޭ ގޮތުން ކެފޭ އަދި ރެސްޓޯރެންޓް ފަދަ ތަންތަން ހިންގާ ފަރާތްތަކާ ވެސް މަޝްވަރާ ކުރަން ޖެހޭ ކަމަށް އޭނާ ފާހަގަކުރިއެވެ.
ސަރުކާރުން ކުރިން ނިންމާފައި ވަނީ މި މަހުގެ 15 އިން ފެށިގެން ވޭޕް އެތެރެ ކުރުން މަނާ ކުރުމަށެވެ. އަދި އަންނަ މަހުގެ 15 އިން ފެށިގެން ވޭޕް ބޭނުން ކުރުމާއި ވިއްކުން މަނާ ކުރުމަށެވެ. ނަމަވެސް ބިލުގެ މަސައްކަތް ލަސްވުމާ ގުޅިގެން މި ތާރީހުތަކަށް ބަދަލު އައުމުގެ ފުރުސަތު އެބައޮތެވެ.
