ހަލީލަށް އަރުވާފައިވަނީ "އޯޑާ އޮފް ދަ ރައިސިން ސަން، ގޯލްޑް އެންޑް ސިލްވާ ސްޓާ" ނަމަކަށް ކިޔުނު ޝަރަފެކެވެ.
މިއީ އެކި ދާއިރާތަކުން ފާހަގަކޮށްލެވޭ ހިދުމަތްތައް ކޮށްދޭ ފަރާތްތަކަށް ޖަޕާނުގެ އެމްޕެރާ ދެއްވާ ޝަރަފުގެ އިއްޒަތެކެވެ.
ހަލީލަށް މި ޝަރަފު އެރުވީ ޖަޕާނު ޖަޕާނާއި ރާއްޖެއާ ދެމެދު އޮތް ގުޅުން ވަރުގަދަ ކުރުމަށް އޭނާ ކޮށްދެއްވި ހިދުމަތަށް އެރުވި ޝަރަފެކެވެ.
ހާރިޖީ ދާއިރާގައި ހަލީލް މަސައްކަތް ކުރައްވާތާ މިހާރު 42 އަހަރު ވެއްޖެ އެވެ.
ރައީސް އިބްރާހީމް މުހައްމަދު ސޯލިހްގެ ސަރުކާރުގައި ވަނީ ހާރިޖީ ދާއިރާގައި ހަލީލް ކުރެއްވި މަސައްކަތުގެ އަގުވަޒަން ކުރެއްވުމުގެ ގޮތުން ހާރިޖީ ދާއިރާގެ ހިދުމަތުގެ އެންމެ މަތީ ޝަރަފުވެސް އަރުވާފަ އެވެ.
ހަލީލަށް މި ޝަރަފު ލިބިވަޑައިގަތުމާ ގުޅިގެން ކުރީގެ ފޮރިން މިނިސްޓަރު އަބްދުﷲ ޝާހިދުވަނީ ހަލީލަށް މަރުހަބާ ވިދާޅުވެފަ އެވެ.
އޭނާ ފާހަގަކުރެއްވި ގޮތުގައި 42 އަހަރު ހާރިޖިއްޔާއަށް ހިދުމަތްކުރެއްވި ހަލީލަކީ ރާއްޖޭގައި އަދި މި ސަރަހައްދުގައިވެސް ތިއްބެވި އެންމެ ގަދަރުވެރި ޑިޕްލޮމެޓުންގެ ތެރޭގައި ހިމެނިވަޑައިގަންނަވާ ބޭފުޅެކެވެ.
އަދި ޖަޕާނާއި ރާއްޖޭގެ މެދުގައި އޮންނަ ގުޅުން ބަދަހިކުރެއްވުމުގައި ހަލީލު ދައްކަވާފައިވަނީ ވަރުގަދަ ނުގުނޑާ އަޒުމެއްކަމަށްވެސް ޝާހިދު ވިދާޅުވި އެވެ.
