ފުޓްބޯޅަ ސްކޫލް ހަދަން ހުޅުމާލޭން އެފްއޭއެމަށް ދޫކުރި ބިމުގެ ކުލި ނުދައްކާތީ އެތައް އަތުލަން ނިންމައި، ހުސްކުރަން ކުރިން އޮތީ އެފްއޭއެމަށް އަންގާފައެވެ.
"ގައުމީ ފުޓްބޯޅަ ސްކޫލްގެ ނަމުގައި" އެ ތަން ހިންގަން ރެއާލް މެޑްރިޑްގެ ކުރީގެ ޑިފެންޑަރު މިޝޭލް ސަލްގާޑޯއާ އެކު އެފްއޭއެމުން އެއްބަސްވުމެއް ވެސް ހެދި އެވެ. އެކަމަކު، ފުޓުބޯޅަ ސްކޫލާ ގުޅޭ އެއްވެސް ކަމެއް ނުކޮށް، ފަހުން ފެނުނީ އެ ބިމުގެ ބައެއް ތަންތަން ވިޔަފާރިތަކަށް ކުއްޔަށް ދޫކުރި ތަނެވެ.
އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އިސްވެ ހުރެ މިދިޔަ އަހަރުތަކުގައި ހިންގި ބޮޑު ހިޔާނާތާ ގުޅިގެން، އެ އިދާރާގެ ކަންކަން ބޮއްސުންލައިގެން ގޮސްފައިވާއިރު، އެފްއޭއެމްގެ ބެލުމުގެ ދަށުގައި އޮތް ބިން އަނބުރާ އެޗްޑީސީ އަށް ނެގި ކަން އެ ކުންފުނިންވަނީ އަންގާފައެވެ.
އެޗްޑީސީން އެފްއޭއެމަށް އެންމެ ފަހުގެ އިންޒާރުދީ ހަރުކޮށްފައިވާ ނޯޓިހުގައި ބުނެފައިވަނީ ހަފްތާއެއްގެ ތެރޭ ތަން ހުސްކުރަން ޖެހޭ ކަމަށެވެ. އެކަން އެ ގޮތަށް ނުކޮށްފިނަމަ އިތުރު ފިޔަވަޅުތައް އަޅާނެކަމުގެ އިންޒާރު އެފްއޭއެމަށް އެޗްޑީސީންވަނީ ދީފައެވެ.
