އެއަޕޯޓުން މައުލޫމާތު ދިން ގޮތުގައި މި ފިއުލް ފާމަކީ ކުރިން ހުރި ފިއުލް ފާމަށްވުރެ ތިން ގުނަ ބޮޑު ތަނެކެވެ. މި ފިއުލް ފާމުގައި ޖެޓް ފިއުލްގެ އިތުރުން އެއް މިލިއަން ލީޓަރުގެ ޑީސަލް އަދި 100،000 ލީޓަރުގެ ޕެޓްރޯލް ރައްކާކުރެވޭނެ އެވެ. އަދި މުސްތަގުބަލުގައި އިތުރު ދެ ޓޭންކު އިތުރުކުރެވޭނެ ގޮތަށް ވަނީ ފަރުމާކޮށްފަ އެވެ.
އާ ފިއުލް ފާމުގައި އަށް ކިލޯމީޓަރުގެ ދިގު ހޮޅިލައިނެއް ވަނީ އަޅާފަ އެވެ. މި ހޮޅިލައިނުން މަތިންދާބޯޓުތަކަށް ސީދާ ފިއުލް ފޯރުކޮށްދެވޭނެ އެވެ. މީގެ ސަބަބުން ބޮޑެތި މަތިންދާބޯޓުތަކަށް ފިއުލް އެޅުމަށް ބޭނުންކުރާ ވެހިކަލްތަކުގެ ބޭނުން ކުޑަވެގެންދާނެ އެވެ.
އެއަޕޯޓުން ބުނީ މި ނިޒާމުގެ ސަބަބުން މާހައުލަށް ކުރާ އަސަރު ކުޑަވެ، އެއަޕޯޓުގެ ސަލާމަތީ ފިޔަވަޅުތައް ވެސް ހަރުދަނާވެގެންދާނެ ކަމަށެވެ. އަދި މަތިންދާބޯޓުތަކަށް ފިއުލް އެޅުމަށް ހޭދަވާ ވަގުތު ކުޑަވެ، އެއަޕޯޓުގެ ހިދުމަތްތައް އިތުރަށް ހަލުވިވެގެންދާނެ ކަމަށް ވެސް އެއާޕޯޓުން ބުނެފައިވެ އެވެ.
