ޗައިނާ ސަރުކާރުން ހަދިޔާކުރި އާލާތްތަކާ ހަވާލުވުމަށް ފޮރިން މިނިސްޓްރީ އާއި ރާއްޖޭގައި ހުންނަ ޗައިނާގެ އެމްބަސީއާ ދެމެދު އެއްބަސްވުމެއްގައި ވަނީ ސޮއިކޮށްފަ އެވެ.
މި އެއްބަސްވުމުގައި ފޮރިން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަބްދުﷲ ހަލީލް އެވެ. ޗައިނާ އެމްބަސީގެ ފަރާތުން ސޮއިކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިން އެވެ.
ޗައިނާ ސަރުކާރުން ދިވެހި ސަރުކާރަށް ހަދިޔާކުރި 80 ކޮމްޕިއުޓަރާއި 20 ލެޕްޓޮޕަކީ ލެނޮވޯ ބްރޭންޑްގެ އާލާތްތަކެއް ކަމަށް ފޮރިން މިނިސްޓްރީން ބުނެ އެވެ.
ރާއްޖެ އާއި ޗައިނާއާ ދެމެދު އޮންނަ ގާތް ގުޅުމުގެ ތެރެއިން އެގައުމުން ވަނީ ރާއްޖެއަށް 1،000 ސްކޮލާޝިޕްގެ ފުރުސަތު ދީފަ އެވެ. ޗައިނާ އިން ދިން 1،000 ސްކޮލާޝިޕަކީ ފަސް އަހަރަށް ބަހާލައިގެން ދިވެހި ސިވިލް ސާވިސް މުވައްޒަފުންނަށް ހަމަޖައްސައިދީފައިވާ ސްކޮލާޝިޕް ތަކެކެވެ.
މި ސްކޮލަޝިޕްގެ ފުރުސަތުގެ ތެރެއިން ކޮންމެ އަހަރަކު 200 ފަރާތަކަށް ފުރުސަތު ދިނުމަށް ވަނީ ނިންމާފަ އެވެ.
ޗައިނާއިން އަންނަނީ ރާއްޖެއަށް އަބަދުވެސް އެކި ގޮތްގޮތުން އެހީތެރިކަން ފޯރުކޮށްދެމުންނެވެ. އެގޮތުން މީގެ ކުރިން ވެސް ކޮމްޕިއުޓަރާއި ލެޕްޓޮޕްފަދަ އިލެކްޓްރޯނިކް ސާމާނު ހަދިޔާކޮށްފައިވެ އެވެ.
