މި ސްކީމަކީ ރާއްޖޭގެ އެކި ރަށްރަށުގައި ފަޅަށް ހުރި ގޯތިތަކުގައި ގެދޮރު އިމާރާތްކުރުމަށް ފައިސާ ދޫކުރުމަށް އެކުލަވާލި ސްކީމެކެވެ. އަދި މި ސްކީމުގެ ސަބަބުން މާލީ ތަނަވަސްކަން ނެތް އާއިލާތަކަށް ގެދޮރުގެ ތަނަވަސްކަން ލިބިގެންދާނެކަމަޑް ހައުސިން މިނިސްޓްރީން ބުނެއެވެ.
އެ މިނިސްްޓްރީން ބުނީ ހިޔާވެހި ފައިނޭންސިންގ ޕްރޮގްރާމް، “ހިޔާވެހި ޕޯޓަލް” މެދުވެރިކޮށް ފައިނޭންސިން ޕްރޮގްރާމްގައި ބައިވެރިވުމަށް އެދި ހުށައެޅުމުގެ ފުރުސަތު މިއަދުން ފެށިގެން ހުޅުވާލާފައިވާކަމަށެވެ.
ހައުސިން މިނިސްޓްރީން ބުނީ މި ސްކީމުގެ ދަށުން ހުސް ބިމެއްގައި އަލަށް އިމާރާތެއް ކުރުމަށް ނުވަތަ ނުނިމި ހުރި އިމާރާތެއް ނިންމުމަށް ނުވަތަ ބާވެފައިވާ އިމާރާތެއް މަރާމާތުކުރުމަށް ލޯނު ނެގިދާނެ ކަމަށެވެ. އަދި ދޫކުރެވޭ ލޯނުގެ އަދަދުން މަޝްރޫއު އެއްކޮށް ނިންމޭވަރު ވާންޖެހޭނެ ކަމަށް އެ މިނިސްޓްރީން ބުންޏެވެ.
މި ސްކީމަށް އެދެވޭނީ އަމިއްލަ ނަމުގައި ނުވަތަ ދައުލަތުން ދޫކޮށްފައިވާ ބޯހިޔާވަހިކަމެއް ނެތް ފަރާތްތަކަށެވެ. އަދި އިކުއިޓީއެއް ދައްކާކަށް ނުޖެހުނަސް، ޝަރީއާ އުސޫލުތަކާ އެއްގޮތަށް އަމަލުކުރުމަށް "ނޮމިނަލް ކޮންޓްރިބިއުޝަން" އެއް ދައްކަންޖެހޭނެ ކަމަށް މިނިސްޓްރީން ބުންޏެވެ.
