އިންޑިޔާއިން، އޮލިމްޕިކްސް އަދި ޕެރަ އޮލިމްޕިކްސް ހޯސްޓް ކުރަން ޝައުގުވެރިކަން ފާޅުކޮށްފައިވަނީ 2036 ވަނަ އަހަރުގެ ގޭމްސް ބޭއްވުމަށެވެ. އިންޑިޔާއިންވަނީ، އިންޓަނޭޝަނަލް އޮލިމްޕިކް ކޮމިޓީގެ ފިއުޗާ ހޯސްޓް ކޮމިޝަނަށް ލެޓަރ އޮފް އިންޓެންޓް މިހާރު ހުށަހަޅާފައެވެ.
2036 ވަނަ އަހަރުގެ ގޭމްސް ބޭއްވުމަށް އިންޑިޔާ ހިމެނޭހެން އެހެން ބައެއް ގައުމުތަކުންވަނީ ޝައުގުވެރިކަން ފާޅުކޮށްފައެވެ. އޭގެ ތެރޭގައި މެކްސިކޯ (މެކްސިކޯ ސިޓީ، ގުއަޑަލަޖާރާ-މޮންޓެރީ-ޓިޖުއާނާ)، އިންޑޮނޭޝިއާ (ނޫސަންޓާރާ)، ތުރުކީ (އިސްތަންބޫލް)، ޕޮލެންޑް (ވާސޯ، ކްރަކޯވް)، މިސްރު (ނިއު އިދާރީ ވެރިރަށް) އަދި ދެކުނު ކޮރެއާ (ސޯލް-އިންޗިއޮން) ހިމެނެ އެވެ. އިންޑިޔާއިން ޝައުގުވެރިކަން ފާޅުކޮށްފައިވަނީ އަހުމަދުއާބާދުގައި އޮލިމްޕިކް ގޭމްސް ބާއްވާށެވެ.
އިންޑިޔާގައި މިހާތަނަށް އަދި އޮލިމްޕިކް ގޭމްސް ބާއްވާފައެއް ނުވެއެވެ. އެހެންނަމަވެސް އިންޑިޔާގައި ކޮމަންވެލްތު ގޭމްސް އަދި ފީފާ ވޯލްޑްކަޕްގެ އުމުރުފުރާގެ ބައެއް މުބާރާތްތައް އަދި ކްރިކެޓް ވޯލްޑްކަޕް ބާއްވާފައިވެއެވެ.
