މި މީހަކީ އައްޑޫ ސިޓީ ހިތަދޫ ވެހެތާނުގޭ އުމުރުން 65 އަހަރުގެ އަބްދުﷲ ސާދިގުއެވެ.
މި މީހާ ވަނީ މިދިޔަ ސެޕްޓެމްބަރު މަހާއި އޮކްޓުބަރުމަހު ރާއްޖެއަށް ވައިގެ މަގުން ޑްރަގު އެތެރެކުރަން މަސައްކަތް ކުރަނިކޮސް ހައްޔަރުކޮށްފައެވެ.
ލަންކާމަގުން ރާއްޖެއަށް މަސްތުވާތަކެތި ވައްދަނިކޮށް ސެޕްޓެމްބަރު މަހުގެ 16 ވަނަދުވަހު މި މީހާވަނީ ފުރަތަމަ ފަހަރަށް ކަސްޓަމުން އަތުލައިގެންފައެވެ. އެ ފަހަރު ހައްޔަރުކޮށް ބަންދަށް ޖެހި 15 ދުވަސް ހަމަވެ މިނިވަން ވުމުން އަނެއްކާވެސް ލަންކައަށް ފުރައިގެން ގޮސް ރައްޖެއަށް ޑުރަގު އެތެރެކުރަނިކޮށް ދެވަނަ ފަހަރަށް އަތުލައިގަތީ މިދިޔަ އޮކްޓޫބަރު މަހުގެ ފަހުކޮޅުއެވެ.
އެ ފަަހަރު އޭނާ ރާއްޖެއައި އިރު ގެނައި ލަގެޖުގައި އޮތް މާ ޖަހާފައިވާ 3 ވާސްގެ ތެރެއިން ހިރޮއިން ވަނީ ފެނިފައެވެ. އެތަކެތީގެ ބަރުދަނުގައި 270 ގްރާމް ހުރިކަމަށް ކަސްޓަމުން ވަނީ ބުނެފައެވެ.
މީނާގެ މައްސަލައިގެ ތަހުގީގު ނިންމާ ދައުވާކުރުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާކަމަށް ފުލުހުން ބުނެއެވެ.
