"އޮލިންޕިއަންސް ވިތް ޔޫތް- ލައިވް އިން ކޮންސާޓް" ނަމުގައި ބާއްވާ މި ޝޯތައް އޮންނާނީ މި ސަރުކާރަށް އެއް އަހަރު ފުރޭ ދުވަހާއި ދިމާކޮށް މިމަހުގެ 17، 18 އަދި 19 އޮލިމްޕަހުގައެވެ.
އެންސީއޭއިން ބުނީ މި ޝޯ ބާއްވަނީ ދިވެހިންގެ ފަންނީ އުފެއްދުންތެރިކަމާއި، ހުށައަޅައިދިނުމުގެ ޤާބިލްކަމާއި، ހުނަރުވެރިކަން އިތުރަށް ތަރައްޤީކޮށް ކުރިއަރުވައި ދެމެހެއްޓުމާއި، އަދި ފަންނުވެރިންގެ ހުނަރުވެރިކަން އާންމުނަށް ތަޢާރުފުކޮށް ހިންގުމާއި ޒުވާނުން މިދާއިރާއިން ކުރިއަށް ދިއުމަށް ބާރުއެޅުމުގެ މަޤްސަދުގައިކަށެވެ.
އެ ގޮތުން މި ކޮންސަޓް އަކީ ލަވަ ކިޔުމުގެ ދާއިރާއިން މަޤުބޫލުކަން ހޯދާފައިވާ ކުރީގެ މަޝްހޫރު ލަވަކިޔުންތެރިނާއި މިހާރު ރާއްޖޭގެ މިޔުޒިކް އިންޑަސްޓްރީގައި ކުރިއަރަމުން އަންނަ ޒުވާން ލަވަކިޔުންތެރިން ކުރީގެ ލަވަތައް އަދި އިތުރު އާ ލަވަތަކާއި އެކު ޑުއެޓް ގޮތުގައި ހުށައަޅާއިދޭނެ ކޮންސަޓެއްކަމަށް އެންސީއޭއިން ބުނެއެވެ.
"އޮލިންޕިއަންސް ވިތް ޔޫތް- ލައިވް އިން ކޮންސާޓް" މި ބާއްވަނީ 7 އަހަރުގެ މެދު ކެނޑުމަކަށްފަހުކަމަށްވެސް އެންސީއޭއިން ބުނެއެވެ.
އޮލިމްޕިއަންސް ވިތު ޔޫތު ލައިވް އިން ކޮންސަޓްގައި ޕާފޯމްކުރާނެ ވޯކަލިސްޓުން އަދި ބޮޑުބެރު ޖަހާ 2 ފަރާތެއް ހޯދުމަށް އެންސީއޭއިން ވަނީ އާއްމުކޮށް ހުުވާލާފައެވެ. އެގޮތުން އެކަމަށް ޝައުގުވެރިވާ ފަރާތްތަކުން އެ ފަރާތެއްގެ ސީވީ / ޕްރޮފައިލް [email protected] އަށް މިމަހުގެ 13ގެ ކުރިން ފޮނުވުމަށް އެންސީއޭއިން އެދެއެވެ.
