ރާއްޖޭގެ އެންމެ ކާމިޔާބު ފުޓުބޯޅަ ކްލަބް ނިއު މި ވަގުތު އޮތީ ދެ ވަނަ ޑިވިޝަނުގަ އެވެ. އެ ކްލަބުން މި މަހުގެ 20 ވަނަ ދުވަހު ކޮންގްރެސް ބާއްވަން ތައްޔާރުވަމުން އަންނައިރު، އެ ކްލަބްގެ ޗެއާމަންކަމުގެ މަގާމު މި ވަގުތު އޮތީ ހުސްވެފައެވެ. އެއީ ކުރިން އެ މަގާމުގައި ހުންނެވި އަހުމަދު ވާސިފް އިސްތިއުފާ ދެއްވުމުންނެވެ.
ރިޕޯޓްތައް ބުނާ ގޮތުން އެ ކްލަބްގެ ޗެއަރމަނަކަށް ވަޑައިގަންނަވާނީ ރީޖަނަލް އެއާޕޯޓް ކޮމްޕެނީގެ މެނޭޖިން ޑިރެކްޓަރު އަދި ނިއުރޭޑިއަންޓްގެ ވަރުގަދަ ސަޕޯޓަރ އަހުމަދު މުބީނެވެ. ކްލަބްގެ ސީނިއަރ ވައިސް ޗެއަރމަން ކަމަށް ކުރިމަތި ލައްވާނެކަމަށް ބެލެވެނީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި މިހާރު ވެސް ނިއުގެ މެނޭޖަރުގެ މަގާމުގައި ހުންނެވި އަލީ އިބްރާހީމް (ކައްޕި) އާއި ވެމްކޯގެ މެނޭޖިންގ ޑައިރެކްޓަރ މުޖުތަބާ ޖަލީލެވެ.
ރާއްޖޭގެ އެންމެ ކާމިޔާބު ކްލަބު އަޑި އަޅާލީ، އެފްއޭއެމުން އެ ކްލަބު ސަސްޕެންޑް ކުރުމުންނެވެ. ނިއު އިން އެފްއޭއެމްގެ ރައީސް ބައްސާމް އަދީލް ޖަލީލްގެ ލީޑަޝިޕް ބަދަލުކުރަން ކުރި މަސައްކަތުގައި، ބައިވެރިވުމުން، 2019 ވަނަ އަހަރު އެފްއޭއެމް އިން ނިއު ސަސްޕެންޑްކުރި އެވެ. އެ އަޑިގަނޑުން ނިއު އަރައިގަނެ، 2022 ވަނަ އަހަރު ކުޅުނު ދެ ވަނަ ޑިވިޝަން މުބާރާތަށް ނިއު އިން ނުކުމެވޭވަރު ކުރީ ވާސިފް ހިމެނޭހެން ނިއުގެ އެކި ސަޕޯޓަރުންގެ ގްރޫޕެއް އިސްނަގައިގެން ކުރި މަސައްކަތުންނެވެ.
