ބޮޑީ ބިލްޑިން އެސޯސިއޭޝަނުން މާފަށް އެދުނީ، ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ގައުމަށް ލިބޭނެ ހަގީގީ ރީތިނަމެއް، އުފަލެއް، ކާމިޔާބީއެއް ނެތް ކަމަށް ރައީސް ވިދާޅުވެފައިވަނިކޮށް، އެ މުބާރާތް ރާއްޖޭގައި ބާއްވާތީ އެކަމާ ގުޅިގެން އާއްމުންގެ ނުރުހުން ސަރުލާރަށް އަމާޒުވެފައިވަނިކޮށެވެ.
އައްޑު އަތޮޅު ކެނެރީފް ރިސޯޓުގައި އޮތް 'ވޯލްޑް ބޮޑީބިލްޑިން އެންޑް ފިޒީކްސް ޗެމްޕިއަންޝިޕް 2024'ގެވީޑިއޯތައް ސޯޝަލް މީޑިއާގައި ދައުރުވާން ފެށުމާ އެކު ގިނަ ބައެއްގެ ނުރުހުމާއި ފާޑުކިޔުން އެކަމަށް ވަނީ އަމާޒުވުމުން، ބޮޑީ ބިލްޑިން އެސޯސިއޭޝަނުން މިއަދު ބުނީ މުބާރާތް ބާއްވަން ކޮންޓްރެކްޓް ހެދުމަށް ފަހު، ކެންސަލްކޮށްފި ނަމަ ރާއްޖޭގެ ކުޅިވަރު އެސޯސިއޭޝަންތަކަށާއި މާލީ ގޮތުންނާއި އެހެން ގޮތްގޮތުން ރާއްޖެއަށް ލިބިދާނެ ގެއްލުންތަކަށް ވިސްނުމަށް ފަހު މުބާރާތް ބޭއްވުމަށް ނިންމީ ކަމަށެވެ.
ބޮޑީބިލްޑިން އެސޯސިއޭޝަނުން ބުނީ މި ފަދަ ބައިނަލްއަގްވާމީ މުބާރާތެއް ރާއްޖޭގައި ހޮސްޓް ކުރަން މަސައްކަތް ކުރީ، ރާއްޖޭގެ ނަން ބައިނަލްއަގްވާމީ ކުޅިވަރުގެ ދުނިޔޭގައި ވަރުގަދަކުރުމަށާއި އެކަމުގެ ސަބަބުން ރާއްޖޭގެ އިގްތިސޯދަށާއި ޓޫރިޒަމަށް ލިބޭނެ ކުރިއެރުމަށް ވިސްނައިގެން ކަމަށެވެ.
އަދި މި މުބާރާތް ކުރިއަށްގެންދަން ރައީސް ޑރ. މުހައްމަދު މުއިއްޒުގެ ތަސައްވުރާ އެއްގޮތަށް ސްޕޯޓްސް މިނިސްޓްރީން އިރުޝާދު ދިން ގޮތަށް މުބާރާތް ކުރިއަށްގެންދެވޭތޯ މަސައްކަތްކުރި ކަމަށް ބީބީއޭއެމް އިން ވަނީ ބުނެފަ އެެވެ.
ބޮޑީބިލްޑިން އެސޯސިއޭޝަނުން ބުނީ މި މުބާރާތް ބާއްވާފައި ވަނީ އާންމުން ދިރިނޫޅޭ، އަދި ޓޫރިސްޓުން ރާއްޖެ އައިސް އެ މީހުންގެ ވައްޓަފާޅިއާ އެއްގޮތަށް އުޅުމުގެ ފުރުސަތު ދިނުމަށް ހުއްދަ ދީފައިވާ ކެނެރީފް ރިސޯޓުގައި ކަމަށެވެ.
