މުޅި މަޖިލީހުގެ ކޮމިޓީގައި މި އިސްލާހު ހުށަހެޅުއްވީ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދެވެ. އެ އިސްލާހު ފާސްވީ 41 މެންބަރުންގެ އަގުލަބިއްޔަތުންނެވެ.
މި އިސްލާހުގެ ދަށުން އުވާލާ ޕާޓީތަކުގެ ކުލަޔާއި، ނަމާއި، ނިޝާނާއި، ލޯގޯ، އަދި އެހެންވެސް ޕާޓީ ރަމްޒުކޮށްދޭ އެއްވެސް އެއްޗެއް ކުރިއަށް އޮންނަ ފަސް އަހަރު ވަންދެން އެއްވެސް ފަރާތަކަށް ބޭނުމެއް ނުކުރެވޭނެ އެވެ.
މި އިސްލާހާއެކު، ސިޔާސީ ޕާޓީތަކުގެ ގާނޫނަށް އިތުރު އިސްލާހެއް ވެސް ވަނީ ގެނެސްފަ އެވެ. އެއީ ކޮންމެ ފަސް އަހަރަކުން އެއްފަހަރު ގައުމީ ބައްދަލުވުމެއް ނުބާއްވާ ޕާޓީތައް އުވާލުމުގެ މާއްދާ އުވާލުމެވެ. މި އިސްލާހު ފާސްވީ 39 މެންބަރުންގެ ވޯޓުންނެވެ.
މި އިސްލާހުތަކާއެކު ސިޔާސީ ޕާޓީތަކުގެ ގާނޫނަށް އިސްލާހު ގެނައުމުގެ ބިލު ވަނީ މަޖިލީހުގެ ތަޅުމަށް ފޮނުވާފަ އެވެ. އަދި މާދަމާ އެ ބިލަށް ބަހުސްކޮށް ވޯޓަށް އަހާނެ ކަމަށް ބެލެވެ އެވެ.
ދާދިފަހުން އިލެކްޝަންސް ކޮމިޝަނުން ވަނީ ކުރީގެ ރައީސް މައުމޫނުގެ ދަރިކަލުން ފާރިޝްމައުމޫނު އިސްކޮށް އުޅުއްވާ އެމްއާރުއެމް އުވާލުމަށް ނިންމައިފައެވެ. އުވާލަން ނިންމީ އެ ޕާޓީއަށް ގާނޫނުގައި ބުނާ މިންވަރަށް މީހުން ހަމަނުވެގެންކަމް ރިޕޯޓުތައް ބުނެއެވެ.
