ފިނޭންސް މިނިސްޓްރީން ބުނީ މިހާރު ދެމުން އަންނަ ކަރަންޓު، ކަރަންޓު އުފެއްދުމަށް ބޭނުންކުރާ ތެޔޮ، ކާޑު އަދި ނަރުދަމާގެ ހިދުމަތަށް ދެމުން އަންނަ ސަބްސިޑީތައް އުވާލުމަށްފަހު، އެ ފައިސާ ސީދާ ގޭބިސީތަކުގެ އެކައުންޓަށް ޖަމާކުރާ ގޮތަށް ހަމަޖެހިގެންދާނެ ކަމަށެވެ.
މި ބަދަލާ އެކު އެންމެ ފަގީރު 20 ޕަސަންޓު ގޭބިސީތަކުގެ ހަރަދު މަހަކު އެވްރެޖްކޮށް 1،770 ރުފިޔާއިން އިތުރުވެގެންދާނެ ކަމަށް އަންދާޒާކުރެވުނު ނަމަވެސް، ކޭޝް ޓްރާންސްފާގެ ގޮތުގައި އެ ގޭބިސީތަކަށް މަހަކު އެވްރެޖްކޮށް 2،450 ރުފިޔާ ލިބޭނެ ކަމަށް އެ މިނިސްޓްރީން ބުންޏެވެ.
ސަބްސިޑީ ލިބޭ ގޭބިސީތައް ކަނޑައަޅާނީ އެ ގޭބިސީއަކަށް ލިބޭ އާމްދަނީއަށް ބިނާކޮށް ނުވަތަ ޕްރޮކްސީ މިންސް ޓެސްޓް (ޕީއެމްޓީ) މޮޑެލްއެއް ބޭނުންކޮށްގެން ކަމަށް ފިނޭންސް މިނިސްޓްރީން ބުންޏެވެ. އަދި މި ނިޒާމުގެ ދަށުން އަންނަ އަހަރު 900 މިލިއަން ރުފިޔާ ހަރަދުވާނެ ކަމަށް ލަފާކުރެވޭ ކަމަށާއި މި ނިޒާމު ތަންފީޒުކުރަން ފަށާނީ އަންނަ އަހަރުގެ އޭޕްރީލް މަހުން ފެށިގެން ކަމަށް ވެސް އެ މިނިސްޓްރީން ބުންޏެވެ.
ސަބްސިޑީ ނިޒާމަށް އައި ބައެއް މުހިންމު ބަދަލުތައް:
- އެންމެ ފަގީރު 20 ޕަސަންޓު ގޭބިސީތަކަށް މަހަކު 2،450 ރުފިޔާ ލިބޭނެ
- އާ ނިޒާމު ތަންފީޒުކުރަން ފަށާނީ 2024 ގެ އޭޕްރީލް މަހުން
- އަހަރަކު 900 މިލިއަން ރުފިޔާ މި ނިޒާމަށް ހަރަދުވާނެ ކަމަށް ލަފާކުރޭ
- ސަބްސިޑީ ލިބޭ ފަރާތްތައް ކަނޑައަޅާނީ އާމްދަނީއަށް ބަލައިގެން
- މިހާރު ދެމުން އަންނަ ކަރަންޓު، ކާޑު އަދި ނަރުދަމާގެ ސަބްސިޑީތައް އުވާލެވޭނެ
