ރޭ ހުޅުމާލޭގައި ކާރެއްގައި ރަހީނުކޮށް އަނިޔާކޮށްފައިވަނީ ދިވެހި ފިރިހެނަކަށެވެ. މި މައްސަލާގައި މިއަދު ހެނދުނުވެސް ވަނީ މީހަކު ހައްޔަރުކޮށްފައެވެ އެއީ މާލޭ، ދަފްތަރު ރސ 9022 އުމުރުން 37 އަހަރުގެ ތޮލާލް މޫސާއެވެ.
ފުލުހުން ބުނީ މިިމީހުން މީހަކު ކާރެއްގެ ތެރޭގައި ރަހީނުކުރީ ހުޅުމާލޭގައި ރޭގައިކަމަށެވެެ. އަދި އެ މީހާއަށް އަނިޔާކޮށް އޭނާގެ އާއިލާއަށް ގުޅާ ފައިސާއަށް ޑިމާންޑުކޮށްފައިވާކަމަށް ވެސް ފުލުހުން ބުނެއެވެ.
މި މައްސަލާގައި ހައްޔަރު ކުރި މީހުންގެ ތެރޭގައި އެއްގެޔަކަށް ނިސްބަތްވާ ދެމީހުންވެސް ހިމެނެއެވެ.
މި މައްސަލާގައި ހައްޔަރުކުރި އިތުރު މީހުން
- ހދ. ކުމުންދޫ / ރަތްބަގީޗާގޭ އުމުރުން 34 އަހަރުގެ ހުޝާމް އިބްރާހިމް
- ހދ. ކުމުންދޫ / ރަތްބަގީޗާގޭ އުމުރުން 36 އަހަރުގެ އާދަމް ޝަރީފް
- ގ. ކަޅަގާރިމާގެ އުމުރުން 23 އަހަރުގެ ހުސެއިން ހައިކަލް
- ހުޅުމާލެ ފްލެޓް ނަމްބަރު 04-1-71 އުމުރުން 26 އަހަރުގެ އަހްމަދު ރިޝްފާން
ފުލުހުން ބުނީ މި މީހުންގެ ބަންދާއި މެދު ގޮތެއް ނިންމުމަށް ހުޅުމާލެ ކޯޓަށް ގެންދިޔުމުން އެންމެނަށް 7 ދުވަސް ޖަހާދީފައިވާކަމަށެވެ.
މި މައްސަލަ ބަލަމުން އަންނަކަމަށް ފުލުހުން ބުނެއެވެ.
ފަހަކަށް އައިސް މާލޭގައ މީހުން ރަހީނުކުރުން ވަނީ އިތުރުވެފައެވެ. މިދިޔަ ހުކުރު ވިލޭރޭވެސް މީހަކު ރަހީނުކޮށް އެމީހާގެ ބޯބާލައި އިނގިއްޔެއް ބުރިކޮށްލަން ތައްޔާރުވެފައިވަނިކޮށް ފުލުހުން ވަނީ އެމީހާ ސަލާމަތްކޮށްފައެވެ. ހިޔާ ޓަވަރު އެޕާޓްމަންޓެއްގައި އެމީހާ ރަހީނުކޮށްގެން ގެންގުޅުނު މައްސަލާގައި 12 މީހަކު ވަނީ ހައްޔަރުކޮށްފައެވެ.
