އެމްއެމްއޭއިން ބުނީ އާއްމުކޮށް އެމްއެމްއޭއިން މިފަދަ ފައިސާ ބޭރުގެ ބޭންކުތަކުގައި އިންވެސްޓް ކުރި ނަމަވެސް، އޮކްޓޫބަރު 2024 ގައި އެމްއެމްއޭ އިން 120 މިލިއަން ޑޮލަރު ރާއްޖޭގެ ބޭންކުތަކުގައި އިންވެސްޓް ކޮށްފައިވާކަމަށެވެ. މިނިންމުމުގެ މަގުސަދަކީ މިއިންވެސްޓްމަންޓުން ލިބޭ ނަފާ ވީހާވެސް ބޮޑުކުރުމާއި މާލީ ދާއިރާގެ ކުރިއެރުމާއި ހަމަޖެހުމަށް މަގުފަހިކޮށް މުޅި އިގްތިސާދަށް ފައިދާވާނެ ގޮތަށް ކަންކުރުންކަމަށް އެމްއެމްއޭއިން ބުނެއެވެ.
މި ބަދަލުތަކާ އެކު ، މިއަހަރުގެ ސެޕްޓެމްބަރުމަހު ނިމުނުއިރު އޮފިޝަލް ރިޒާވް އެސެޓްސް 371.2 މިލިއަން ޔޫއެސް ޑޮލަރުގައި ހުރި ނަމަވެސް، އޮކްޓޯބަރު ނިމުނުއިރު އޮފިޝަލް ރިޒާވް އެސެޓްސް ވަނީ 614.6 މިލިއަން ޔޫއެސް ޑޮލަރަށް އިތުރުވެފައިވާކަމަށް އެމްއެމްއޭއިން ބުނެއެވެ.
ރަސްމީ ރިޒާވް އިތުރުވި ނަމަވެސް، ޔޫސަބަލް ރިޒާވްގެ އަދަދުގައި ހުރީ 31.5 މިލިއަން ޑޮލަރެވެ. އެމްއެމްއޭ އިން ބުނިގޮތުގައި، ޔޫސަބަލް ރިޒާވް ހިސާބުކުރަނީ ރާއްޖޭގެ ބޭންކުތަކުގައި އިންވެސްޓްކޮށްފައިވާ 120 މިލިއަން ޑޮލަރު ހިމަނައިގެންނެވެ.
