ބަންގްލަދޭޝްއާ ދެކޮޅަށް ކުޅޭ އެކުވެރިކަމުގެ ދެ މެޗަށް ގައުމީ ޓީމު މިހާރު ތިބީ ބަންގްލަދޭޝްގައެވެ. މާދަމާ އަދި މި މަހުގެ 16 ވަނަ ދުވަހު ބަންގަލްދޭޝްއާ ދެކޮޅަށް ކުޅޭ ފީފާ ރަސްމީ ފްރެންޑްލީ މެޗުތަކާ ގުޅޭ ގޮތުން ސުޒޭން ބުނީ، ޖުމްލަކޮށް ތައްޔާރީތަކާ މެދު ހިތްހަމަ ޖެހޭ ކަމަށެވެ.
އެންމެ ފަހުން ރާއްޖެ އާއި ބަންގްލަދޭޝް ކުޅުނު ހަ މެޗަށް (2021 ވަނަ އަހަރުން ފެށިގެން) ބަލާއިރު، ބަންގްލަދޭޝް ވަނީ ތިން މެޗުން މޮޅުވެފަ އެވެ. ރާއްޖެ ދެ މެޗުން މޮޅުވިއިރު، އެއް މެޗު ނިމުނީ އެއްވަރުވެގެންނެވެ. ބަންގްލަދޭޝް އާއި ރާއްޖެ ކުޅޭ މެޗު ފަށާނީ މާދަމާ ހަވީރު 17:00 ގަ އެވެ.
ބަންގްލަދޭޝާ ކުޅޭ ފުރަތަމަ މެޗުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ސުޒޭން ވަނީ ބަންގްލަދޭޝް ފުޓްބޯޅަ ފެޑެރޭޝަނުން މި މެޗުތަކަށް ދިން ދައުވަތަށް ޝުކުރު އަދާކޮށްފަ އެވެ. އަދި، މިއީ، ބައިނަލްއަގުވާމީ ފުޓްބޯޅަ އަލުން ފަށަން ރާއްޖެ އަށް ފަހިވި ފުރުސަތެއްގެ ގޮތުގައި ސުޒޭން ވަނީ ފާހަގަކޮށްފަ އެވެ.
