އުރީދޫން ބުނެފައިވަނީ، ޑިސެމްބަރު 20 ވަނަ ދުވަހު ބާއްވާ މި ދުވުމުގައި ހަ އަހަރުން މަތީގެ އެންމެންނަށް ވެސް ބައިވެރިވެވޭނެ ކަމަށާއި މިދުވަމަކީ ފަސް ކިލޯމީޓަރުގެ ދުވުމެއް ކަމަށެވެ.
އުރީދޫއިން ބުނީ ފަން ރަންގައި ބައިވެރިވާން ބޭނުންވާ ފަރާތްތަކަށް ޕޯޓަލް މެދުވެރިކޮށް ރަޖިސްޓްރޭޝަން ފުރިހަމަ ކުރެވޭނެ ކަމަށެވެ.
ފަން ރަންގެ ކިޓްތައް ލިބެން ހުންނާނީ ސްޓޭންޑަޑް ކިޓް އާއި ފަން ކިޓް ކެޓަގަރީންނެވެ. އެގޮތުން، ސްޓޭންޑަޑް ކިޓްގައި ފަން ރަން ޓީޝާޓް އަދި ރިސްޓްބޭންޑް ހިމެނޭއިރު އޭގެ އަގަކީ 100 ރުފިޔާ ކަމަށް އުރީދޫން ބުނެފައިވެއެވެ.
އޭގެއިތުރުން، 210 ރުފިޔާއަށް ލިބޭ ފަން ކިޓްގައި އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި ފޮތި ދަބަސް، އައިނު އަދި ބަންޑާނާ ހިމެނެ އެވެ.
ފަން ރަން ދުވުމަކީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ، ޖޮގްކޮށްފަ، ދުވެފަ ނޫނީ ނަށަމުންވެސް އެ ދުވުން ނިންމިދާނެއެވެ.
އުރީދޫ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށް އުރީދޫއިން ބުންޏެވެ.
އުރީދޫ ފަން ރަން އަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަގުބޫލު އެއް ހަރަކާތެވެ. މިދިޔަ އަހަރު ހުޅުމާލޭގައި ކުރިއަށް ގެންދިޔަ މި ހަރަކާތްތަކުގައި 5،000 އަށްވުރެ ގިނަ މީހުން ބައިވެރިވި އެވެ.
