މީޑިއާ ރެގިއުލޭޓްކުރަން މިހާރު އޮންނަ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އުވާލާ އެއްކޮށްލަން 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު'ގެ ނަމުގައި މަޖިލިހަށް ބިލެއް ހުށައެޅުއްވީ ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރުއެވެ. މި ބިލުގެ ފުރަތަމަ ކިޔުން މިއަދުގެ މަޖިލީހުގެ ޖަލްސާއަށް ވަނީ އެޖެންޑާކޮށްފައެވެ.
ކޮމިޝަން އެކުލެވިގެން ވަނީ 7 މެމްބަރުންގެ މައްޗަށެވެ. އޭގެތެރެއިން 4 މެމްބަރުންނަކީ ރައީސް އައްޔަންކުރައްވާ ހަތަރު މެމްބަރުންނެވެ. އަނެއް ތިން މެމްބަރުންނަކީ މީޑިއާތަކުން އިންތިހާބު ކުރާ ބައެކެވެ.
މި ބިލުގައި ވަނީ އަލަށް އުފެދޭ ކޮމިޝަނަށް ނޫސްވެރިން ބޮޑެތި އަދަދު ޖޫރިމަނާކުރުމާއި ލައިސަންސް ބާތިލުކުރަން ކޯޓަށް ދިއުމުގެ ބާރު އެ ކޮމިޝަނަށް ދީފައެވެ.
މި ބިލުގައިވާ ގޮތުން ކޮމިޝަނުން ކަނޑައަޅާ ސުލޫކީ މިންގަނޑަކާ ހިލާފުވަމުންދާ ނަމަ، ދޫކޮށްފައިވާ ބްރޯޑްކާސްޓިން ލައިސެންސް ނުވަތަ ނޫސް މަޖައްލާއެއް ނަމަ ދޫކޮށްފައިވާ ރަޖިސްޓްރީ ބާތިލުކުރުމަށް ކޯޓަށް ހުށަހެޅުމުގެ ބާރު ކޮމިޝަނަށް ލިބިފައިވެއެވެ. އަދި ކޯޓުން ނިންމާ ގޮތެއްގެ މަތިން ލައިސެންސް ނުވަތަ ރަޖިސްޓްރީ ބާތިލުކެރެވޭނެކަަމަށްވެސް ބިލުގައިވެއެވެ.
މީގެއިތުރުން އިސްލާމްދީނާއި ގައުމުގެ ސަލާމަތާއި އާންމު ނިޒާމު ނުވަތަ އާންމު ސިއްހަތަށް އޮތް ނުރައްކަލެއް ކަމަށް ބެލެވިދާނެ ހާލަތުގައި ދައުލަތުގެ ކަމާ ގުޅުންހުރި އިދާރާތައް މެދުވެރިކޮށް އެ ކޮންޓެންޓެއް ބްރޯޑްކާސްޓްކުރުން ހުއްޓުވުން ނުވަތަ އެ ކޮންޓެންޓެއް ޝާއިއުކުރި ވަސީލަތެއް ހުއްޓުވުމަކަށް ގެނައުމުގެ ބާރުވެސް ކޮމިޝަނަށް ވަނީ ދީފައެވެ.
އަޅާ ބައެއް ފިޔަވަޅުތައް
- ރަނގަޅު ކުރުމަށް އެންގުން އަދި ދޭ އިންޒާރު އާންމުކޮށް ޝާއިއު ކުރުން
- ކޮމިޝަނުން އަންގާ ވަގުތެއްގައި އަންގާގޮތެއްގެ މަތިން ކުށުގެ އިސްލާހު އާންމުކުރުމަށް ނުވަތަ ކޮށްފައިވާ ކަމެއް އަނބުރާ ގެންދިޔުމަށް ބަޔާނެއް އާންމު ކުުރުމަށް އެނގުން
- ކުށް އިސްލާހުކޮށް ތަކުރާރުވިޔަ ނުދިނުމުގެ ގޮތުން ކޮންމެހެން ކުރަން ޖެހޭ ކަމެއް ނުވަތަ ނުކޮށް ދޫކޮށްލަން ޖެހޭ ކަމެއް ކުރުމަށް އެންގުން
ބިލުގައިވާ ގޮތުން ބްރާޑްކާސްޓް ކުރާ ފަރާތަކުން ތަކުރާރުކޮށް ގާނޫނާއި ގަވައިދާ ހިލާފުވަމުންދާ ނަމަ އެ ޗެނަލެއް ވޭތުވެދިޔަ އަހަރު އެ ފަރާތަކަށް ލިބުނު އާމްދަނީގެ 10 އިންސައްތައަށް ވުރެ ބޮޑު ނޫން އަދަދަކުން ޖޫރިމަނާ ކުރުމުގެ ބާރު ވަނީ ކޮމިޝަނަށް ދީފައެވެ.
ނޫސް މަޖައްލާއަކުން ގާނޫނާއި ގަވައިދު އަދި ސުލޫކީ މިންގަނޑާ ތަކުރާރުކޮށް ހިލާފުވެއްޖެނަމަ އެ ނޫސް ނުވަތަ މަޖައްލާއެއް 5،000 ރުފިޔާ އާއި 50،000 ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ ބާރުވެސް ކޮމިޝަނަށް ލިބެއެވެ.
ނޫސްވެރިން ވެސް ކޮމިޝަނުން ކަނޑައަޅާ ސުލޫކީ މިންގަނޑާ ހިލާވެއްޖެ ނަމަ ފިޔަވަޅު އެޅުމުގެ ބާރު ކޮމިޝަނަށް ލިބިގެންވެއެވެ. އެގޮތުން ގާނޫނާ ހިލާފަށް ކުރި ކަމެއް ރަނގަޅު ކުރަން އެނގުމާއި ކޮމިޝަނުން ރަނގަޅު ކުރުމަށް އަންގާ ކަމެއް އިސްލާހުކުރުމަށް އަންގާފައިވާ މުއްދަތު ތެރޭގައި އިސްލާހުނުކޮށްފި ނަމަ، 5،000 ރުފިޔާއާއި 10،000 ރުފިޔާއިން އާ ދެމެދުގެ އަދަދަކުން ޖޫރިމަނާ ކުރުމުގެ ބާރު ކޮމިޝަނަށް ވަނީ ދީފައެވެ.
ބިލުގައިވާ ގޮތުން ކޮންމެ ފަރާތަކަށްވެސް ކޮމިޝަނަށް ޝަކުވާ ހުށައެޅުމުގެ ފުރުސަތު އޮންނާނެއެވެ. އަދި ޝަކުވާ ހުށައަޅާތާ އެއްމަސް ދުވަހުގެ ތެރޭގައި ކޮމިޝަނުން އެ މައްސަލަ ނިންމަންވާނެއެވެ.
