ރާއްޖެއާ ބަންގްލްދޭޝް، އެ ގައުމުގައި ކުޅޭ އެކުވެރިކަމުގެ ދެ މެޗަށް ދިވެހި ޓީމު މިހާރު ތިބީ ބަންގްލަދޭޝްގައެވެ. ދެ ޓީމުގެ ފުރަތަމަ މެޗު މިއަދު ކުޅޭނެއެވެ. ދެވަނަ މެޗު އޮންނާނީ ހޮނިހިރު ދުވަހުއެވެ.
މިއަދުގެ މެޗާ ބެހޭ ގޮތުން ވާހަކަ ދައްކަމުން، ބަންގްލަދޭޝް ކޯޗު ކަބްރޭރާ ބުނީ އަބަދުވެސް ރާއްޖެއާ ދެކޮޅަށް ކުޅެން އުނދަގޫ ކަމަށެވެ. "އަބަދުވެސް ރާއްޖެއާ ދެކޮޅަށް ކުޅެން އުނދަގޫ، އެއީ ގޮތްނޭނގޭ ޓީމެއް، ކުރީގައި ތިބި ކުޅުންތެރިން ކޮންމެ ތަފާތެއް ވެސް ދައްކަފާނެ، އެކަމަކު، އަހަރެން މި ހުރީ ދެ މެޗުން މޮޅުވާން އަމާޒު ހިފައިގެން،" ޕްރީ މެޗު ޕްރެސްގައި ކަބްރޭރާ ބުންޏެވެ.
އެންމެ ފަހުން ރާއްޖެ އާއި ބަންގްލަދޭޝް ކުޅުނު ހަ މެޗަށް ބަލާއިރު، ބަންގްލަދޭޝް ވަނީ ތިން މެޗުން މޮޅުވެފަ އެވެ. ރާއްޖެ ދެ މެޗުން މޮޅުވިއިރު، އެއް މެޗު ނިމުނީ އެއްވަރުވެގެންނެވެ.
ބަންގްލަދޭޝް އާއި ރާއްޖެ ކުޅޭ މެޗު ފަށާނީ މިއަދު ހަވީރު 17:00 ގަ އެވެ. އަހަރެއް ވަންދެން ރާއްޖޭގައި ރަސްމީ ފުޓްބޯޅައިގެ އެއްވެސް ހަރަކާތެއް ނެތް ނަމަވެސް، ބަންގްލަދޭޝްއާ ދެކޮޅަށް ކުޅޭ އެކުވެރިކަމުގެ މެޗުތަކުގެ ތައްޔާރީތަކާ މެދު ހިތްހަމަ ޖެހޭ ކަމަށް ގައުމީ ޓީމުގެ ކޯޗު އަލީ ސުޒެއިންވަނީ ބުނެފިއެވެ.
