ސަރުކާރުގެ ފަރާތުން މި އިސްލާހު މަޖިލިހަށް ހުށައެޅި ދިއްދޫ ދާއިރާގެ މެންބަރު އަބްދުއްލަތީފް މުހައްމަދުއެވެ. އެނާ ހުށައަޅުއްވާފައިވަނީ ސިޔާސީ ޕާޓީގެ ޤާނޫނު އިސްލާހު ކުރުމަށެވެ.
މި ބިލް މިއަދުން މަޖލީހުން ފާސްކުރީ 61 މެމްބަރުން ވޯޓާއި އެކުއެވެ. މަޖިލިހުން ބިލް ފާސްކުރީ ކޮމެޓީ މަރުހަލާގައި ހިމެނި ދެ އިސްލާހާއިވެސް އެކުއެވެ. މުޅި މަޖިލީހުގެ ކޮމިޓީގެ ވަގުތު އިތުރު ދެ އިސްލާހު ގެނަން ހުށައެޅީ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދެވެ.
ފުރަތަމަ އިސްލާހަކީ ސިޔާސީ ޕާޓީގެ އެއްވަނަ މާއްދާއަށް އަކުރެއް އިތުރުކުރުމެވެ. އެގޮތުން ސިޔާސީ ޕާޓީއެއް ގާނޫނާ އެއްގޮތަށް އުވާލާނަމަ، އެ ޕާޓީގެ ނިޝާނާއި، ލޯގޯ ނުވަތަ ޕާޓީ ރަމްޒުކޮށްދޭ އެއްޗެއް، އެހެން ޕާޓީއަކުން ބޭނުންކުރެވޭނީ ޕާޓީ އުވާލާ ތާރީހުން ފެށިގެން ފަސް އަހަރު ފަހުންކަމަށް އެ އަކުރުގައި ހިމެނުމަށެވެ.
ދެވަނަ އިސްލާހަކީ ކޮންމެ ފަސް އަހަރަކުން އެއް ފަހަރު ޕާޓީގެ ގައުމީ ބައްދަލުވުމެއް ނުބާއްވާނަމަ އިލެކްޝަންސް ކޮމިޝަން އިން އެ ޕާޓީއެއް އުވާލުމެވެ.
ސަރުކާރުން މި ގާނުނަށް ހުށައެޅި އިސްލާހުގައި ވަނީ ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފިނަމަ، އެ މީހަކު ނިސްބަތްވާ ޕާޓީ 100،000 ރުފިޔާއިން ޖޫރިމަނާ ކުރެވޭނެކަަމަށެވެ. މިހާރު ގާނޫނު ބުނާގޮތުން ޕާޓީއެއްގެ މެންބަރުކަމަށް ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ އެކަން ކުރި ފަރާތެއް -/5,000 ރުފިޔާއާއި -/10,000 ރުފިޔާއާ ދެމެދުގެ ޢަދަދަކުން ޖޫރިމަނާކުރެވޭނެއެވެ. އަދި އެނޫންކަމެއް ކޮށްފިނަމަ އެ މީހެއް -/30,000 ރުފިޔާއާއި -/75,000 ރުފިޔާއާ ދެމެދުގެ ޢަދަދަކުން ޖޫރިމަނާކުރެވޭނެކަމަށްވެސް މިހާރު އަމަލުކުރާ ގާނޫނުގައިވެއެވެ.
ސަރުކާރުން ހުށައެޅި އިސްލާހުގައި ވަނީ މި މާއްދާއަށް އިތުރު ނަމްބަރެއް ހިމަނާ ގަވައިދާ ހިލާފަށް އަމަލުކުރާ ޕާޓީގެ މެމްބަރުންގެ އިތުރުން ޕާޓިވެސް ޖޫރިމަނާ ކުރެވޭގޮތް ހަދަންށެވެ. އެ ގޮތުން ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފިނަމަ، އެ މީހަކު ނިސްބަތްވާ ޕާޓީ 100،000 ރުފިޔާއިން އިން ޖޫރިމަނާ ކުރަން ވަނީ ހިމަނާފައެވެ.
